Da ka Water Guardian pynkha ka tnad PHE ban ithuh ia ki shnong ba pynneh ia ki tyllong um

Shillong, Nailar 21 : Ka tnad Public Health Engineering (PHE) ka la pynkha bad pyllait paidbah ïa ka Water Guardians : Strengthening Sustainable Communities ka sienjam hapoh ka Jal Jeevan Mission da ka thong ban ai ka jingithuh ïa kito ki shnong ha Meghalaya kiba la buh hakhmat eh ban pynneh ïa ki tyllong um ha ki shnong ki thaw jong ki.
Ïa katei ka sienpyrshang, kaba don ïa ka thong ban pynlong ïa ka Meghalaya kaba pahuh ka umbam umdih, la pylalit paidbah da u Myntri ka tnad PHE, Marcuise N Marak kum u Kongsan ha ka jingïalang kaba long hynne ka sngi Nyngkong.
U Myntri haba kren ha katei ka jingïalang u la banjur ïa ka jingdonkam ban donlang ka jingtrei ryngkat ryngkat na bynta ban pynneh pynsah ïa ki tyllong umbam. U ong ruh ba katei ka sienjam ka long ban ïohi ba kan don ka jingpyrshang kaba borbah ba pynneh ïa kitei ki tyllong um. Ha kajuh ka por u la kyntu ruh ïa ki paidbah nongshong shnong ba kin ai ka jingïatrei lang na ka bynta ban pynlong ïa ka Meghalaya ka jylla kaba pahuh um.
Na ka liang ka Jal Jeevan Mission ka khot ka wer ruh ïa ki riewshimet bad ki shnong ki thaw ban snohkti lang ha katei ka jingpyrshang na bynta ka lawei kaba pahuh.