Mynjur u Lat ïa ka Market Bill, ïoh bor ka KHADC ban tuklar ïa ka ot kilo bad ka dor mar rep

Shillong, Nailar 17 : Ka Khasi Hills Autonomous District Council (KHADC) mynta ka la ïohbor ban tehlakam ïa jingshah ot kilot bad ruh ïa ka dor ka mur jong ki mar rep lane kiwei kiwei ki jait mar hapoh ki ïew ki hat kiba hap ha u pud u sam jong ka hadien ba u Lat u la mynjur bad soi ïa ka Market Bill ba kan long aiñ noh bad tip mynta kum ka KHADC (Establishment, Mangement and Control of Markets) (Second Amendment) Regulation, Act 2021.
Haba kren bad ki lad pathai khubor ha kane ka sngi Palei, ka Executive Member ba dei peit ïa ka Market, Kong Grace Kharpuri ka la ïathuh ba da ka jingmynjur jong u Lat ïa katei ka Bill, mynta ka Council ka lah ruh wat ban tuklar wat ïa ka dor ka mur khnang ba ki nongrep kiba wan die ïa ki mar jong ki, kin ym shah khñiot dor.
“Da ka jingmynjur jong u Lat, kane ka ain kan long ka jingkyrkhu kaba khraw ïa ki nongrep ha kaba yn shimkhia ïa kiba bun ki jingeh kiba mad da ki nongrep kynthup halor ka jingshah ot kilo ki mar rep bad kan shimkhia ruh ha kaba ïadei bad ka bha ka miat ïa kiba wan die ïa ki jingri,” ka la ong.
Kawei pat ka bynta ba ka EM ka kdew ka long ba kan don ruh ka jingbuh jinglum kyrteng naduh ki trai dukan kumjuh ïa ki nongshim wai. Ka la ïathuh ruh ba kan don ka jingpyrkhing wat ban die ïa ki jingdie ba ktah ïa ka imlang sahlang.
La ïathuh ruh ba kan don ruh ka komiti ba kyrpang kaban tip kum ka ‘Agricultural Produce and Livestock Marketing Facilitation Sub-Committee kaban peit ïa ka jingpyntyllun ïa kane ka kam.Ym tang katta, la ïathuh ba katei ka sub-committee kan peit ruh ba ka dor ka mur kan ym dei ban long hapoh ïa ka dor kaba la buh da ka Council.
Nalorkata, la ïathuh ruh ba da ka jingpyntreikam ïa katei ka aiñ kan ym don shuh kata ka jingkot kilo kyllum ïa ki mar rep kumba la ju khnium da ki nongrep baroh shi katta haba ki leit ban die jingdie ha ïew nalor kiwei kiwei ki kyndon kiba bun.