Jop ka Maharam Govt. HSSM ïa ka District Level Students’ Science Seminar 2023

Mawkyrwat, ‘Nailar 17: Ka Maharam Government Higher Secondary School, Mawkyrwat (MGHSSM) ka dei kawei na ki 9 tylli ki skul kaba la rah ïa ka nam jop ha ka District Level Students’ Science Seminar 2023 ba la pynlong da ka ophis jong ka District School Education Officer, (DSEO), South West Khasi Hills District halor ka phang, “Millets – A Super Food or a Diet Fad”, hapoh ka Hall jong ka Maharam Government Higher Secondary School, Mawkyrwat.
Lah ban kdew ba kane ka prokram ka long kum shibynta jong ka jingpynkhreh ban rakhe ïa ka National Science Seminar ka ban sa long ha ka 12 tarik u Risaw, 2023 ha Nongbah Delhi ryngkat ka jingïatreilang bad ki jylla ne ki Union Territories, kaba ka phang ka dei, “Millets – A Super Food or a Diet Fad”, ha ka Hall jong ka Maharam Government Higher Secondary School, Mawkyrwat.
Ka jingthmu jong kane ka program ka long ban jied ïa ki khynnah skul na ka District Level ki ban sa mihkhmat ha ka State Level bad kumjuh ruh ha ka National Level ha kaba lyngba kane ha ka District Level yn pynshlur bad ai mynsiem ïa ki khynnah skul ba kim dei ban lehraiñ ban ban mihshakhmat ban wan ïashimbynta ha ki rynsan lyngba ka jingpyni jong ki ïa ka sap ka phong ba ki ki don bad ban long ki khynnah skul kiba skhem ban kren ïa ka jingshisha kaba ki ki la pynkhre lyngba ki jingai jingmut na ki nonghikai.
U bah A.L. Bareh, EAC jong ka South West Khasi Hills District ha ka jingkren jong u kum u kongsan u la ai khublei ïa ka ophis jong ka District School Education Officer, (DSEO), South West Khasi Hills District kaba la shimkhia ban pynlong ïa kane ka jingïatai ne ka seminar bad kumjuh ruh ïa ki 9 tylli ki skul kiba la mih shakhmat ban ïashimbynta da kaba u kyntu ïa ki ba kim dei ban buhrieh ïa ka sap ba ki don hynrei ki dei ban pyni sha ka pyrthei khnang ba ka lawei jong ki kan long kaba phyrnai.
U la ong ruh ba ka jingwan ïashimbynta jong ki khynnah skul ha kane ka District Level ka pyni ba ki long ki khynnah kiba shlur bad kiba don shisha ïa ka mynsiem jong ka jingïakop. Ha kajuh ka por u la ai ruh ki kyntien jingkitbok kitrwiang ïa ka Maharam Government Higher Secondary School, Mawkyrwat kaba la jop ha kane ka District Level bad ka ban sa long kawei na ki skul ka ban mihkhmat ïa ka distrik sha ka State Level bad ba kan sa ïoh rah ruh ïa ka jingjop.
Ha kane ka prokram, ki skul kiba la wan ïashimbynta ki long ka Seven Sisters Secondary School, Mawmitbah, ka Jingiaseng Kynthei Mawkyrwat Presbytery Higher Secondary, School, ka Presbyterian Higher Secondary School, Mawlangwir, ka Nativity Higher Secondary School, Mawkyrwat, ka Balang Mawlangwir Higher Secondary, School, ka Kerlin Secondary School, Mawten, ka Maharam Government Higher Secondary School, Mawkyrwat, ka Sharakrit Secondary School, Nongkenbah bad ka Nolikata Higher Secondary School, Ranikor ha kaba kine ki skul ki la ïashimbynta ha ki ar tylli ki bynta kata ka Aptitude Test bad ka Presentation.
Ki skul kiba la poi sha ka thong jong ka jingjop ki long ka Maharam Government Higher Secondary School, Mawkyrwat (MGHSSM) ha ka kyrdan ba nyngkong, ka Presbyterian Higher Secondary School, Mawlangwir (PHSSM) ha ka kyrdan ba ar bad ka Nativity Higher Secondary School, Mawkyrwat (NHSSM) ha ka kyrdan ba lai.
Ïa ka jingïalang ha kane ka sngi la pynïaid da u bah S. Kharbteng, Sub Inspector (SI) of Schools bad ka jingkren pdiang na kong S. Kharsahnoh, District School Education Officer, (DSEO), South West Khasi Hills District katba ïa ka jingkren ai khublei la ïoh na ka kong N. Nongrum, UDA napoh ka ophis jong ka District School Education Officer, (DSEO), South West Khasi Hills District.