Lyngba ka jingthoh pynpaw ka JNC Nongkhlieh sha ka MLA ïa ka jingshah ieh beiñ ka thaiñ ha ki kam pynroi

Khliehriat, Nailar 14: Ka Jaiñtia National Council (JNC), Nongkhlieh Circle hynne ka sngi Nyngkong hapoh ka jingïalam u Bah Nikki Sutnga President ka la leit ban aiti da ka dorkhas sha ka MLA ka thaiñ ka Kong Santa Mary Shylla ban pynpaw ka jingsngewkhia kaba jur ha kaba ïadei bad ka jingshah iehnoh beiñ ka thaiñ ha ka liang ki kam pynroi hapoh ka Elaka Nongkhlieh, EJHD.
Na ka liang ka Seng ka la ong ba hadien ba la pynlong ïa ka East Jaiñtia Hills District ha u snem 2012, ki nonshong shnong ka Elaka Nongkhlieh ki la pynpaw ba ki don ka jingkyrmen ban ïohi ïa ka roi ka par, ka jingkiew ha ka liang ka koit ka khiah, ka pule puthi ka ioh kam ioh jam bad kiwei kiwei ki kam pynroi, hynrei kane kam shym la long satia kumba la khmih lynti.
Ka Seng ha u kyrwoh ka la ong ba ka East Jaiñtia Hills ka dei kawei na ki district kaba riewspah ha ka jingdon jong ki marpohkhyndew ha ka jylla bad kaba la noh synniang shibun ha kaba ïadei bad ka GDP ha ka jylla.Hynrei, ka long kaba sngew bynñiaw bad kane ka district EJHD ka la shah iehnoh beiñ ha ka sorkar jylla.
Kumjuh ka seng hadien ka jingiamir jingmut lyngba ka MLA ka thaiñ ka la phah ruh ïa ki jingdawa kiba shongnia ïa kiba ka seng ka la dawa ban pyntreikam noh mardor khnang ban lah ban kyntiew ïa ki kam pynroi hapoh ka thaiñ.
Khnang ban weng ïa ka jingeh jong ki paidbah ka thaiñ, ka Seng ka la dawa ban shna noh da ka lynti surok kaba bha na Moolasngi sha Daistong kaba dei ka thaiñ kaba pajih hapoh ka Elaka Nongkhlieh kaba la mad shibun ki jingeh namar ka jingbym don ka surok kaba biang, kumjuh ha kaba iadei bad ka jingpynioh ïa ka umbam umdih, ki jaka aijingsumar bad kiwei pat, Ka seng ka la ong ba ki shnong kiba hap hapoh kane ka Elaka ki la sahkut noh na kiwei pat ki bynta jong ka district ha ka por lyiur namar ki surok kiba sniew kaba la wanrah ruh ka jingduhnong kaba kot sha kumba 90% ha ka liang ka rep ka riang.
Shuh shuh ka seng ka la ong ruh ba ka surok Moolasngi sha Lelad ka dei ka surok ba kongsan na ka bynta ki nongshong shnong ka thaiñ namar dei tang kane ka lynti surok kaba pyniasoh ïa ki ha ki jingtrei jingktah, ki kam khaïi pateng ka pule puthi bad kiwei pat.Kumta ka seng ka dawa ban shim khia mardor ban shna pynbha ïa kane ka surok.
Nalor kata ka Seng ka la ong ruh ba man la u snem ka sorkar jyll ka pynlut da ki klur na ka bynta ban kyntiew ïa ki jaka sumar ha ki thaiñ nongkyndong kiba pajih na ki jaka sor ban pynthikna ïa ki lad jingsumar.Kumta ruh halor kane ka seng ka dawa jur na ka sorkar ba kan phaikhmat lem sha kane ka Elaka bad ban wanrah da ka Primary Health Centre (PHC) hapoh Nongkhlieh Elaka kaba dei ka mat jingdawa jongbka seng ka ba la slem kaba dei ruh ka jingdawa jong ki nongshong shnong ka thaiñ.
Ha kajuh ka por ka Seng ka la dawa ruh na ka sorkar ba kan wanrah ïa ka Veterinary Dispensary hapoh ka Elaka khnang ba kan long ka jingiarap kaba khraw na ka bynta ki nongri jingri kiba don ha ka thaiñ namar haduh mynta hi ym don satia ki veterinary ha ki thaiñ ba marjan bad kane ka wanrah ka jingeh kaba khraw na ka bynta ki jingri jingdup kiba donkam ïa ki jingsumar.