Nongstoiñ, Nailar 10: Namar ka jingbym biang ka um bad jingker ha ki ar tylli ki Sub Health centre ka Byrki bad Sangriang, ki nongïalam ka Federation of Khasi Jaiñtia & Garo People Nongkhum circle mynta ka sngi palei ki la leit ban ïakynduh ïa ka District Medical & Health Officer jong ka West Khasi Hills ha ophis trei kam jong ka na ka bynta ban ïakren halor katei ka mat.
Hadien ba ki la mih na ka kamra treikam jong ka DM&HO u bah Sanbor Rynshiang President ka circle u la ong ba ka jingleit ïakynduh jong ki nongïalam ka seng ïa katei ka ophisar, ka dei namar ba kitei ki ar tylli ki jaka sumar kim don ïa ki fencing bad ha ka por ba slap ki jingri kum ki masi ki blang ki pynlong jaka rih bad ki pynjakhlia ïa ki baranda bad ki rud ki kiar jong kitei ki jaka sumar.
Nalor kata u la ong ruh ba ha kitei ki jaka sumar ka um ruh kam biang satia kumta na ka liang ka seng ka sngewkhia namar ki nongtrei ki shem jingeh ban sumar ïa kiba shitom khamtam ïa ki longkmie kiba wan kha khun ha kitei ki jaka sumar.
Utei u nongïalam ka seng u la ong ruh ba ka jaka sumar kaba don ha Sangriang ka long kham pajih na surok PWD bad ka surok kaba pynpoi haduh phyllaw jongkatei ka jaka sumar ka jrong tang kumba sawspah mitar tam hynrei ka long ka ba sniew bad kaba khohruh khohram kaba ki kali kiba wan buh ïa ki dawai bad kiba wan kit ïa ki longkmie kiba shitom ki shitom bha ban ïaid.
U la ong ruh ba hadien ka jingïatai sani bha, katei ka ophisar ka la kular ban shimkhia bad ban pyntip sha ka sorkar ba kan leh ïa kaba don kam. Nalor kata utei u nongïalam ka seng u la ong ruh ba ki la pynsngew ruh ha kaba ïadei bad ka jingduna nogntrei ha kitei ki Sub Health centre, hynrei katei ka ophisar ka la pynshai ba katkum ki kyndon treikam jong ka sorkar, ym lah ban thung bun ngut ki nongtrei ha ki Sun health centre, hynrei tang ar ngut bad ha kitei ki Sub health centre kum ha Mawlangsu, Mawlieh, Mawdoh bad Mawdumdum ki nongtrei ki la don.
U la ong ruh ba katei ka ophisar ka la ong ruh ba ka sorkar kan sa ai biang sa kawei ka Sub Health Centre, ha kaba ka sorkar ka la dep thung ïa ki nongtrei. Ha katei ka jingleit ïakynduh na ka liang ki nongïalam ka seng ki la aiti ruh da ka jingthoh sha katei ka ophisar ba kan leh ïa kaba donkam.
