Nongpoh, Nailar, 06: Ban nang pynkhlaiñ ïaka jingshakri jong ka seng khamtam sha ki thaiñ khappud, ka seng HITO Ri-Bhoi District haka sngi Saitjaiñ kala ioh ban pynskhem sa kawei pat ka shnat treikam bala tip kum ka HITO Them Marwet Area ban ai ka jingshakri sha ki paidbah khamtam naka bynta ka bha ka miat jong ki paid khappud.
Ïa katei ka jingïalang pynskhem ïaki nongkitkam jong ka Them Marwet la don ryngkat da ki nongïalam ka seng naduh u Bah Apbor Nongrum Vice President, Kenny Nongrum Secretary bad kiwei kiwei.
Ki nongkitkam ba thymmai jong ka Them Marwet ki kynthup ïa u Samla Pynshon Sylliang kum u President, u Shemphang Syiemiong General Secretary, Friendship Langbang Vice President bad kiwei kiwei bala pynskhem bad pynbam smai da u Samla Kenny Nongrum Secretary ka HITO Ri-Bhoi District.
Na ka liang u Samla Kenny u la sneng la kraw ruh ïa kitei ki nongïalam ba thymmai ban bud ïaka nongrim jong ka seng ban ai ka jingshakri sha ki paidbah kumba ka thaiñ khappud ka dei ka jaka kaba ju mih ki kynrum kynram bad kyrmen skhem lyngba ka jingdon kitei ki samla kin long ruh kum ka stieh ban ïada ïaki paidbah haka thaiñ khappud, ban tehlakam ïaka rung kyrthlep ki mynder bad ban im tip briew tip Blei haka akor ka burom.
