Bun bah ki nongpule Kotkhubor kim pat bna bha ïa ka shnong Langdongdai bad lehse kim pat poi ha kane ka shnong ruh. Ka long kaba kongsan ban leit sha kane ka shnong namar ka dei ka Nongbah (capital) jong ka Nonglang Sirdarship bad dang lap bun ki snap jong ki riewhyndai bad ban ïoh ruh ki khana shaphang ki longshuwa. Na ka bynta kito ki ba wad jingtip bniah ban thoh kot, kan bha shibun ban ngam sha kane ka thaiñ Nongtrai ban iit ki snap bad ki sabut jong ki mynbarim. Dang bun ruh ki Jaka ba itynnat ka mariang bad ki sawdong sawkun kiba don ha kane ka thaiñ Nongtrai. Ki khlaw barben te Kim don shuh hynrei ki Jaka ba don diengrit te ki dang kynrei (railung) wat la ka dang jur ka pomram (rep shyrti). Kane ka shnong ka don ha pdeng bha ha ka thaiñ Nongtrai ba hap ha Nonglang Sirdarship, West Hills District. Ka jngai tang 22 km shatei lam sepngi na Riangdo bad 163 km na Shillong. Ban poi sha kane ka shnong hab ban poi shuwa ha Riangdo bad nangta sa bud ïa ka Surok Riangdo-Athiabari kumba 13/14 km bad ynda poi ha Riangsih sa bud ïa ka surok ba leit sha Nongjri bad ynda poi ha Riangkang (dong Nongkynjang) sa bud noh ïa ka surok sha kamon ban poi sha Langdongdai kumba 12 km ei ei, kaba dang khohruh khohram mynta lait tang kumba 2 km ba la siang rong. Ka Nonglang Sirdarship kaba don 42 shnong, ka ïakhap bad ka Jyrngam Sirdarship bad ka Riangsih Sirdarship. Nangta shaphang Mihngi ka ïakhap bad ka Hima Rambrai bad Hima Myriaw bad Shathie lam Sepngi ka ïakhap bad ka Hima Nongstoin. Sepngi pat ka ïakhap bad ka East Garo Hills bad North Garo Hills.
Ïa ka shnong la seng ha ka snem 1956 da u Narendra Borchugrey bad ka kurim jong u, ka Dohne Puwein Bad 11 tylli kiwei pat ki longiing. U Lubon Borchugrey u la long u Sordar shnong banyngkong eh. Mynta ha kane ka shnong ki don baroh 110 tylli ki tnum iing bad 684 ngut ki khlieh briew, 309 ki shynrang bad 275 ngut ki Kynthei. Ki Kur ki jait kiba don ha kane ka shnong ki dei Nianglang, Riangtem, Sohlamar, Tyrsa, Kharbani, Dkhar, Puwein, Swangrey, Rashir, Rongrin, Sangriang, Habiang, Nachugrey, Shiangkata, Nongbak, Kharsnar, Mawlieh, Langsah, Shangdiar, Mangsang, Lyngdoh, Lyngkhoi, Marak, Sohbar, Mawsor, Synshiang, Syiemlieh, Nongkseh bad Rynniaw. Ka jingmut Langdongdai ka mut ‘Langdongdei’ lane u Phlang mih khongpong. Ka ktien ba ki ïakren ka dei ka ktien Nongtrai. Ka jingmut Nongtrai ka mut ‘Nongtrei rep’. Ka ktien Nongtrai kum ka nuksa: phi leit Shano ? = dih Chinu di mi?. Phi kyrteng kumno? = ad kyrtng ai chu mi ra? Phi la dep bamja? = bang ja lyh?. Ki niam ne ban shu sngewthuh kyllum (Balang) kiba don ha kane ka shnong ki dei ka Balang Presbyterian, ka Balang Katholik bad ka Balang U Blei (Meghalaya-Assam). Ym don niam tynrai shuh ba la long Khristan lut. Ka thaiñ Nongtrai ka dei ka Jaka ka bym da shit eh ka suin bneng, mynlyiur bad myntlang ka suin bneng ka tngen jai jai ka shu khriat malu mala. Ka khyndew ka seisoh bha bad ka ïadei bha ban rep ban riang bun jait, wat ki jait soh bapher kum u sohtrun, Sohphan, ka Kait, Dieng kwai, Soh manir bad kiwei kiwei.
Ka jingtrei kaba kongsan jong ki nongshongshnong hangne ka dei ka rep ka riang. Ki rep Kba Pynthor kumba 9 jait ki jait Kba, bad rep kba lum (Kba Bah bad Kba Rit kiba don 8 jait bad kiba lah ruh ban shan lada sniew ka Mariang), u Sying, Synshar, Kwai, Sohmynken, Sohkhia, Sohbaingon, Sohngang, ka Shriew, Phandieng, Pathaw bun jait, Nei-iong, Nei-lieh, Nei-heh, u Krai, Sohphan, ki Kait babun jait, Sohpriam, Sohber, ki Ri, Sohprew, Riewhadem bad kiwei kiwei ki Mar rep. Kaba sngew hun bad sngew Shngaiñ bha bad kaba pynsngewtynnat eh ka long ba 90 na ka 100 na ki longiing ki don khyndew lajong ban shna iing bad rep de ha ka khyndew lajong. Tang kumba 10 na ka 100 ki dei ki nongshongsap (nongshongthap). Tang kumba 10 na ka 100 ki dei kiba ïoh ba kot hynrei, bun kiba duk (BPL) kumba 70 na ka 100, kiwei pat (20/100) kiba shu pdeng bha katba kiba duh bam kim don shuh. Wat la kiba bun ki longiing ki rep Kba hynrei u Khaw lajong u dap bam tang kumba 6 ne 7 bnai namar ki Jaka rep ki la duna bha. Bun ki longiing ki dang hab pet khaw na Iew hynrei u Khaw ba ai ka sorkar (ration) ruh u la ïarap shibun ïa ki longiing ha dang duna.
Ïa kane ka shnong la ker na shatei: da ka Upper Nongdubir, Nongdubir, Lum Mawblei, Porla Nongtrai, Porshken, Mawsmai, Mawkhar, Hawei, Agreng, Poriu, Jasyllar, Madanjira, Mallang Sildubi, Mallang Siminaguri. Shathie: da ka Pormawlein, Mawkyllon, Umkap, Nongmisei, Porthyrnang bad Nongriangken. Sepngi : da ka Mawkaru, Mawkaru-B, Mawkaru -A, Mawkaru- C. Mihngi: da ka Nonghadok bad Lum Sohsan. Napdeng ki shnong baroh ha thaiñ Nongtrai kiba kham rim ki dei ka Hawei bad ka Mawsmai.
Kane ka shnong ka don 4 tylli ki LP skul, kawei ka Upper Primary skul jong ka Nonglang Sirdarship bad don ka Secondary skul ar mala jong kajuh ka Sirdarship ba la shna na ka skhim NEC jong ka 2017-18 hynrei mynta ka dang shu sah khongreng khlem pat pyndonkam. Ki don 11 ngut ki nonghikai bad 290 ki Khynnah skul. Ha ki lad jong ka jingkoit jingkhiah kane ka shnong ka dang jynjar bha, kam don wat tang ka Sub-Centre. Wat ka PHC ruh baroh kawei ka thaiñ kam don hab leit sha Riangdo CHC. Na ka bynta ki leit pule ha ki Klas ba shalor hab leit sha Riangdo, Nongstoin ne sha Shillong lane sha Guwahati. Kane ka thaiñ ka dang sahdien bha hajan baroh ki liang. Ki Skhim sorkar ruh shu thohmat thohmut lait noh ka MNREGS bad khyndiat na ka Soil. Ki Skhim MLA, MDC bad MP ruh ym ju kham ïoh koit. Katkum ka jinglum jingtip na ka thaiñ ha kine ki San snem jong ka sorkar MDA lei lei ka khlem da pynjaw lem ïa ki Soh jong ka jingkyrkhu. Ki paidbah ki thnum bha. Dang bun ruh ki shnong ki bym pat ïoh Surok. Ka Surok sha kane ka Nongbah ruh ka la sahkut. Wat ka Surok bakongsan eh jong ka thaiñ Riangdo-Athiabari ruh kaba la thliew bad ka la kylla kroh, synrang bad ahor lut la bun bun snem la shu ïoh kumto. Mynta ka paw malu mala ki dak shna. Ka surok ba na Bondapara sha Shahlang 52 km ba la mut ban pyntrei da ka NLCPR ruh ka shu sah pongding khlem pyntrei shuh. Ka Surok PMGSY 5 km na Nongjri sha Mawsmai ruh khlem pyntrei shuh. Baroh kawei ka thaiñ Nongtrai ym don Secondary ne Higher Secondary School. Ha pyrkhat lem Maphi ki paidbah Nongpule Khubor ïa ka apot jong ki paidbah jong kane ka thaiñ.
Ki jingmih bakongsan hapoh na kane ka shnong Langdongdai ki long hi ki mar-rep babun jait ba la kdew haneng hynrei kham bun na ki mar-rep ki long tang na ka bynta ki jingdonkam ïalade (self consumption). Tang khyndiat eh kiba tam ki leit die sha Iew kata ruh tang ryngkhat eh bad kawei ka jingeh ka long ba ym pat don ki Surok kiba bha nalor kata ka baikit ruh ka la rem palat. Tang ïa u synsar te ki nongkhaii ki wan thied na shnong. Wat u Sying ruh ym don ba wanthied na shnong namar um da ïaid dor la kham katto katne snem. Ka rep Kait, Sohtrun, Sohphan bad kiwei ki jait Soh ruh ki long bha bad ka wanrah phoida ha kane ka shnong bad ka thaiñ hynrei bun ki trai shnong bad ki marjan shnong kim pat shim khia bym pat don ba ïalam bad hikai. Nalorkata, dang shitom ka leit ka wan bad ka kit ka bah. Ki markhlaw ruh ki la lut, namar ki khlaw ki la lut plaiñ ba rep ram (shyrti) bad la dep shalan Dieng supply mynshuwa. Mynta dang don sa tang ki Mawnar ne Mawiong (Iron one) ha kane ka thaiñ Nongtrai bym pat tih hynrei ka dep thied ïa ki par da ki Company bad riew shimet. Ki don ruh ki Mawlein ( Quartzite) ïa kiba ym pat tih.
Ki paidbah jong kane ka shnong bad ka thaiñ baroh kawei ki wan Iew ha kane ka shnong man la ka sngi Ba-ar ne leit ha iew Gamerimura (Assam) 23 km, Iew Mangsang 20 km (East Garo Hills), Iew Dhupdhara 38 km (Assam) hynrei na ka bynta ki jingdonkam kiba bun jait ki leit sha Iew Riangdo 22 km lane ha Iew Nongstoin 67 km teng teng. Bunsien ki leit thied na Iew Assam ba kham duna dor bad wan die ha ki dukan shnong.
Ka Shnong Langdongdai bad bun ki shnong bamarjan bad ka thaiñ ruh ki long kiba itynnat bha. Dang ïohi hi ïa ka jingjyrngam ka mariang wat la ki khlaw barben kim don shuh. Don ki lum rit baitynnat hynrei u ba kham paw u dei u Lum Dubir. Ki don ki wah kum ka wah Riangken, wah Radiak,wah Ryndi ba mih na kane ka shnong, wah Pormawïap, wah Matsaw, wah Porla, wah Porsuhbuit, wah Kiang bad wah Jira. Don ruh ar tylli ki Kshaid Porla bad Kshaid Porsuhbuit. Nangta don sa ka Thwei Khlongblei ha wah Riangken kaba paw man ha kane ka thaiñ. Don sa ki krem Mawlymbit ha Hawei, krem Mawjinong, ka krem Heh duh ka don hajan ka shnong Hawei. Nangta ka don ka Pung heh Porla Nongtrai kaba dei ka shnong Porla Nongtrai hi mynshuwa kaba la ngam noh bad ka kylla bir noh mynta. Nangta hajan kane ka shnong Langdongdai la lap ki Peisa hyndai da uwei u riewtymmen u “Thaw Khuriang” uba na Porskhen bad ha Langdongdai hi u don u Mawdienjat ki mrad khlaw.
Ha ka liang ka suk ka saiñ, ki nongshongshnong jong kane ka thaiñ ki im ha ka Jingpalei mynsiem bad ka jingïaburom markylliang. Ka jingïashoh Ïada kam ju don koit. Ka thok ka thak para briew ka la sdang roi ïathuh ki briew na ka thaiñ. Ka buaid tanglang ka la don bad ka shongkha khynnah ka dang bun. Ka daw ka long ba la synjor ki longiing longsem, ki Balang ruh ki la synjor palat kim phikir shuh, ki bor shnong ruh kim trei tyngeh shuh haba mih ki jinglyngkar hapdeng ki khun Samla bad ki ai jem. Da ka jingwan ki mobile ki khun samla ki la sdang pyrthuh bun jait kiei kiei. Hynrei, la jar katta ruh ki briew ha shnong bad ha thaiñ ki dang niewkor ïa ka akor ka burom bad ka jingtipbriew tipblei ka dang don hi. Kaei kaba donkam eh ha kane ka shnong bad ka thaiñ, ka long ban ïoh ka jinghikai bad ïalam bajanai ha ka liang bun ki bynta, ki buit Thymmai ha ka rep ka riang, ha ki laiñ khaii pateng, ki jingtbit trei (skill development), ki laiñ kynshew kyndiap, ri jingri, jingtrei synrop lang kumba hikai lyngba ki SHG ha ki Block bad kiwei kiwei ki buit Thymmai. Nalor kiwei kiwei, kaba donkam eh hakhmat duh hi ka dei ka jingshai lyngba ka pule puthi bad ka jingbniah bha ïa ka Ktien u Blei. Ka long kaba sngewsih jur ban tip ba ki briew jong ka thaiñ ki synjor shibun ha ka jingleit jingïaseng kiba long kum ki skul Blei.
