Donkam sa kawei pat ka lynti ban pynïasoh ïa ka NE bad ka ri India

Shillong, Naitung 30 : Ka lympung Commonwealth Parliamentary Association India, Region Zone III, ba pynlong da ka Iing Dorbar Thawain ka jylla ka la kut noh hynne ka sngi U Blei ha nongbah Shillong.
Ha kane ka lympung ki presiding officeer na ki jylla ka thain shatei lam-mihngi jong ka ri, ki nongmihkhmat paidbah, ki commissioner and secretary jong ki Iing Dorbar Thawain ka jylla ka thain shatei lam-mihngi ka ri ki la wan ban shim bynta lang.
Ha ka sngi ba ar kaba dei ruh ka sngi kut jong katei ka lympung la bteng biang ban ïatai halor ka phang kaba iadei bad ka jingwan lyngshop ki bor ka mariang bad kumno ban pynduna ïa ka jingshah ktah bad ruh halor ka jingpyniasoh ïa kane ka thain shatei lam-mihngi jong ka ri bad ka India hi baroh kawei.
Ïa ka lympung kaba la pynïaid da u Chairman ka CPA India Regional III ba dei ruh u Lamphang ka Arunachal Pradesh u Pasang D Sona bad Vice Chairman ka CPA bad Lamphang ka Meghalaya Thomas A Sangma, la sakhi ïa ka jingïatai kaba sani bha ryngkat ka jingai jingmut haba ïadei bad kitei ki phang.
Ïa katei ka lympung la wan ban pynhap pyrda noh da u Lat ka Jylla u Phagu Chauhan kum u Kongsan.
Haba kren ha katei ka jingïalang, u Lat u la ong ba ki mat kiba katei ka lympung ka ïatai ha kitei ki arsngi kidei ki phang kiba kongsan bad ba donkam shisha kyrpang na bynta ka thain shatei lam-mihngi jong ka Ri.
U ong ruh ba lyngba kitei ki jingïatai bad ki jingïasyllok kin mih shibun ki jingmut bad ki sienjam kiba lah ban wanrah pat ïa ki polisi kiba donkam kiba donkam na ka bynta ka roi ka par jong kane ka thaiñ.
Shwa kane, u Chairman ka CPA u la ong ruh ba ha kitei ki arsngi ki la mih shibun ki jingai jingmut kiba donkam kiba ïadei na ka bynta kane ka thain shatei lam-mihngi jong ka Ri. U la ïathuh ruh ba ki nongshim bynta ki la poi ruh ha ka jingmynjur lang haba ïadei bad katto katne ki bynta kynthup naduh kumno ban don sa kawei pat ka lynti ban pynïasoh ïa ka thain shatei lam-mihngi ka ri bad ka ri India nalor ka Siliguri Corridor kaba la tip ruh kum ka surok ryndang syiar ne ‘Chicken Neck’.
U ong ruh ba donkam ban don ka jingwad kaba bniah haba ïadei bad ka jingwan lyngshop ki bor ka mariang ha kane ka thain khnang ban ïoh pat ban shim ïa ki lad ban ïada lypa. U ong ruh ba ïa kitei ki jingai ingmut yn sa buh bad lum thup bha bad yn sa phah pat bad ka Commonwealth Parliamentary Affairs Headquarter kaba ha London, nangta bad ka CPA India Region Headquarters bad ruh bad ki tnad ba dei peit jong ka sorkar pdeng ba kin lah ban pynrung ïa kitei ki jingai jingmut ha ki polisi.