Shillong, Naitung 30 : U Lamphang ka Iing Dorbar Thawaiñ ka Arunachal Pradesh, u Pasang Dorjee Sona ha ka sngi U Blei ula ong ba ka Inner Line Permit ka long kum ka waitlam arliang syrti.
Haba pynshai bha ïa kane, u la ong ba lada don ka ILP, ka don ka jingteh kyndon ïa kito kiba kwah ban theh ïa kino kino ki kam ban kyntiew ïa ka roi ka pa bad ka ïoh ka kot ha ka thaiñ.
“Ka long kumne, lada nga dei u nongbei tyngka ïa kino kino ki kam bad nga kwah ban leit sha kano kano ka jaka. Hynrei lada bun ki kyndon pat nga lah ban leit noh sha kiwei ki jaka kiba kham duna ka jingbuh kyndon,” ong u Sona uba dei ruh u Chairman ka Commonwealth Parliamentary Association (CPA).
Ha kajuh ka por u la ong pat ba lada kren shaphang kumno ban ïada ïa ka jinglong tynrai bad ka riti dustur, ka ILP kadei ka atiar kaba khlain bha ban ïada ïa ki jaidbynriew trai ri, ka kolshor bad ïa ki nongshong shnong.
Shuh shuh u la ong, “Lada phi kwah ban ïada ïa ka jinglong tynrai bad ïa ka kolshor phi hap ban duh ei ei khyndiat ha ka jingdon ki nongbei tyngka hynrei lada phi kwah pat ban don ki nongbei tyngka phi hap hi ban duh khyndiat. Kumta kane ka long kum ka waitlam arliang syrti bad ka shong ha phi kumno ban leh ïa ka,” u la bynrap biang.
Katkum ka jingong jong u, ka ILP ka don la ka jong ka jingïoh nong bad ka jingduhnong.
Katei ka jingkren jong u Sona kadei ruh ha ka por ba ka jingdawa ba dang sahteng jong ka Meghalaya kaba dawa ban pyntreikam noh ïa ka Inner Line Permit ha ka jylla kaba ka sorkar pdeng haduh mynta kam pat ai rai ei ei watla ka Iing Dorbar Thawain ka Jylla ka la mynjur da ka Resolution ha u snem 2019.
Halor ka jingkylli, utei u Lamphang na Arunachal ula ong ba ka sorkar Arunachal kam don jingthmu satia ban weng noh ïa ka ILP na ka jylla. “Kam don satia ha ka jingmut jong ngi ban weng noh ïa ka ILP namar baroh la buh ha kato ka jaka bad ki paidbah ki la tip kumno ban leh namar ka la don ka IL kumta ki la pynkhreh lypa shwa ban wan sha Arunachal,” u la ong da kaba bynrap ba ka sorkar ka la pynsuk ruh ïa ki paidbah da kaba ai online mynta ïa ka ILP khnang ba kito kiba wan ki lah ban shim ïa ka ynda ki la poi ha jaka rung.
“Ka shu don tang ka rukom pyrkhat hynrei mynta baroh la pynsuk lut, phi lah ban aplai online bad ïoh ïa ka ILP khyndiat kynta ha shwa phin leit. Kadei tang ka rukom pyrkhat, phi lah ban weng noh ïa ka na ka jingmut jingpyrkhat bad baroh kan ïaid beit hynrei ka ILP kan dei beit ka ILP,” la bynrap shuh shuh u Sona.
