Nongstoiñ, Naitung 27 : Ka jingkieng Umlipoi kawei na ki jingkieng ban pynïasoh sha ki thaiñ Nongkasen ter ter sha Mawkaton West Khasi Hills District, ka la dkut kynsan katba kawei ka trok kaba ïaid lyngba katei ka jingkieng.
Kane ka jingjia ka la jia hynnin ka sngi balang, kat haduh ba ka la wanrah jingeh ïa ki paidbah ha ka leit ka wan. Kumba ka long mynta ki paidbah katei ka thaiñ, ki hap ban ïaid lyngba ka surok ban poi sha Kynroh ter ter sha Nongstoiñ.
Halor kane ka jingjia, ka Hynñiewtrep Youths Council Lai Lyngdoh Circle mynta ka sngi ryngkat ka HYC Mawkaton Unit, ha ka jingïasynran lang u Samla Wanteibok Lyngdoh General Secretary HYC WKHD, ka la leit ïakynduh ïa I Bah V.Swer MCS ryngkat ka jingthoh halor kane ka jingjia.
Ha ka jingthoh ka Seng ka la kyrpad ïa ki bor jong ka District ban shimkhia kloi kloi halor ka jingdkut kane ka jingkieng ha Umlipoi kaba dei ka lynti ban leit sha Nongkasen.
Ka seng ka la pynpaw shai ruh ba ka daw jong ka jingdkut kane ka jingkieng, ka dei ka jingkit palat pud jong ki trok kiba ïaid lyngba katei ka surok. Ka seng ha kine ki snem, ka buh jingthoh ruh sha ki malik kit jingkit, ba kim dei ban kit palat pud. Tangba ki don kiba shimkhia hynrei don pat kim bym shimkhia.
Kumta ka seng ka kyrpad ïa ki bor ba halor ban shimkhia kloi noh halor kane ka bynta, namar mynta ka lah dei ka por ba ki nongrep kin sah ïoh ban kit ïa ki jhur. U biskot la donkam ban pynpoi sha iew, hynrei lada ym lah ban shna bad pyndep kham kloi, kan ktah ïa kiba bun.
Halor kane ka jingjia bad ka jingkyrpad jong ka seng, u Bah Swer u la ong ba un sah phah ïa kane ka shithi sha u Bah H.K Thabah ADC, namar ka bor ba kham ha khlieh ka shong ha u Bah Thabah. Kumta ka seng ka kyrmen ba u Bah Thabah ryngkat ka office PWD kan shimkhia kloi halor kane, ong u Samla Banlam Lyngkhoi.
