Nongpoh, Naitung 27: Uwei u samla ha ka rta kaba 20 snem u la mynsaw jur, kaba dei hadien ba ka Scooty kaba u ñiah ka la leit ban tynrah ïa kawei ka trok kaba la jia ha ka step phyrngap jong ka 27 tarik u Naitung 2023 ha Nongpoh.
Une u samla uba la mynsaw la tip kyrteng kum u Fernando Malngiang na ka shnong San Mer, Upper Shillong, u la leit ban sah sha Nongpoh ha kine ki khyndiat sngi ban pyndep ïa ka ki katto katne ki kam kiba sah kiba ïadei bad ki kam jong u kpa jongu.
Kumba la ioh lum jingtip, la ong ba u tei u samla ha katei ka miet u la shim da ka scooty jong uba paralok ba ïasah lang bad kaba ïa u number ML 10 C 6277 ban leit thied jingthied ha ka por shiteng miet kumba 12 baje tam ei ei bad kaba sngewlyngngoh ka ïa ki paralok ba u khlem wan phai shuh sha la ïing.
Ïa kane ka jingjia la tip noh ka dei hadien ba ki nongïaid nongieng lyngba kane ka surokbah hajan ka ophis u Deputy Commis sioner ka Ri Bhoi ki la lap ba une u samla u la mynsaw bad ki la pyntip noh sha ki bor pulit bad kiba haing hasem jong u, kaba u la mynsaw na ki bynta jong ka khlieh.
Halor kane ka jingia ki bor pulit ruh tang mar ïa ioh jingtip ki la leit sha katei ka jaka ban ai jingïarap bad ruh hadien ba la tohkit la rah noh ïa une u samla sha Civil Hospital Nongpoh ban ioh ïa ka jingsumar bad namar ba la kham mynsaw jur la rah biang ïa u sha Bethany Hospital Nongpoh ban ioh ïa ka jingsumar kaba kham paka ha kaba hadien la rah noh sha ki jaka ai jingsumar sha Shillong halor katei ka jingmynsaw jong u, kaba u la mynsaw na ka daw ba u la leit ban tynrah ïa kawei ka trok.
Shuh shuh, na ka liang ki bor pulit ka Ri Bhoi ki dang pynlong ïa ka jingtohkit halor kane ka jingjia khnang ban tip ïa ka daw ba shisha jong kane ka jingjia ïa tyngkhuh katei ka Scooty bad ka Trok.
