Mawkyrwat, ‘Naitung 27: U Bah P.S. Lyngdoh kum u President ka Seng Samla Hima Langrin u la takraiñ tyngeh ïa ki dkhot ka Management Board bad ki family members jong ki halor ka jingkynnoh jong ki ba u lah ïalam bakla ïa ki paidbah ban pyrshah ïa ka jingmih ki ar tylli ki bor synshar ha ka Hima.
Shuh shuh u lah ong, bha ban shah kynnoh u nongïalam bakla ban ïa kaba ailad ïa ka buit mynder ri ban wan synshar biang hapoh ka ri Khasi. U la ong ruh ba kam shym don kata jingïalam bakla ïa u paidbah namar hashwa ha jingphah soi iaki paidbah ban pynrem ïa ki jingleh donbor u syiem bad bah phah weng mardor ïa ki jingmih ar tylli ki bor synshar hapoh ka hima kaba long ne aiñ hapoh ka ri Khasi kaba ktah ïa ka riti ka dustur lah don ka public meeting bad public rally kaba pynlong ha ar tylli ki jaka ha ka 16 bad 17 tarik bnai Jylliew, 2023, ha Kensohsan bad Phlangdiloiñ Langrin Syiemship kaba lah tuid da ki hajar ngut ki paidbah ban sakhi bad ban shim ïa ka rai ban dawa hiar shuki noh ïa u Syiem Nangtei Syiemiong bad ban weng noh mardor ïa ka Management Board napoh ka Hima.
Namarkata, na ka liang u Bah P.S. Lyngdoh u la phah da ka khubor kaba shai sha ki khun ki hajar ka Hima Langrin ba kim dei ban rit mynsiem long katba long jia katba jia kin weng beit ïa ka Management Board kaba long ka buit synshar mynder hapoh ka ri Khasi bad ban skhem ka hok long trai khlem da shah ktah ki riti ki dustur khlem da shah pyntlot bor noh ki it ki hima.
“Nga long ruh ba la kloi wat ban shong ha ïing byndi ban pynthikna ba ka hok long trai jong ki khun ki kti ba kan ym duh bad kan shngaiñ ka lawei jong nga bad jong phi”, ong u bah P.S. Lyngdoh.
