Nongstoiñ, Naitung 27: Ka Reserve Bank of India, Shillong, ha ka sngi balang, ka la pynlong ïa ka “Field Level Financial Literacy Event” ha Dorbar Hall jong ka shnong Mawkawah kaba don ha Nongstoiñ, West Khasi Hills District. Ha kane ka prokram haduh 160 ngut ki briew, ba kynthup ïa ki nongrep, SHGs, ki nongseng kam lajong bad kiwei kiwei ki la wan ban ïa shim bynta ha kane ka prokram.
Haduh 18 tylli ki shithi ba la dep sanction ïa ki loan kaba kot haduh 1.08 crore tyngka, la ïoh ban sam sha ki nongïoh jingmyntoi lyngba ki bank kiba treikam hapoh ka thaiñ Nongstoiñ. Shuh shuh, ki la don ruh ki bank kiba la thaw ïa ki miej ai jingïarap na ka bynta ka Social Security Schemes bad ka jingkylliang pisa na ka bynta ka jingmyntoi jong kiba wan ïa shim bynta ha kane ka prokram.
Ïa kane ka prokram la plie da I Bah Olden Nongpluh, General Manager bad Officer-in-Charge (GM(O-i-C)), Reserve Bank of India, Shillong bad la wan ban ïashim bynta da I GM(O-i-C), NABARD, ki ophisar na ka ophis BDO, Nongstoiñ Block bad kiwei pat ki ophisar na ki bank kiba treikam hapoh ka thaiñ Nongstoiñ.
Lyngba jong kane ka prokram, la ïoh ban pynshai bad pynsngewthuh ïa kiba bun jait ki rukom treikam jong ki bank kaba kynthup ïa ka jingmyntoi lada kynshew pisa hapoh bank bad kiwei pat ki lad jingshakri kiba ïoh lyngba ki bank. Ki lad ki lynti kiba dei ban leh bad ki bym dei ban leh, khnang ban lait na ki jingshah thok, jingshah shukor kiba ïadei bad ki kam pisa pilaiñ haba thep ne sei pisa bad kumjuh ruh ïa ka rukom treikam kaba janai ha ka rukom thep pisa lyngba ki UPI, BHIM, USSD, bad kiwei kiwei.
