Lada ka NHAI kam maramot ngin khang lynti noh ïa ka surokbah NH-6 ha Narpuh: KSU & WS

Khliehriat, Naitung, 26: ki Waheh Shnong jong ka thaiñ Narpuh bad ka Khasi Students Union Narpuh Circle, mynta ka sngi ki la leit ban buh da ka jingthoh ha ophis u Deputy Commis-sioner ka East Jaiñtia Hills District bad ha ka jingthoh ki la pynpaw ka jingsngew khia halor ka jinglong jingman ka surok National Highway-6 kaba naduh Mynkre shaduh Malidor kaba la jot la pra bad buh jingeh ïa ki paidbah, halor kane ki la ai por hynñiew sngi ïa ka sorkar bad ïa ka National Highway Autho-rity of India ba maramot ïa katei ka surok, lym kumta ki Waheh Shnong bad ka KSU na Narpuh kin shim da kawei pat ka lynti bad khang lynti ïa ka surok national highway ha Narpuh.
Ha ka shithi sha u Deputy Commissioner, ba la soi da ki Waheh Shnong na Narpuh bad ki nongïalam jong ka KSU Narpuh, ki pynrem jur ïa ka jingleh bym salia ka sorkar bad ka NHAI ka bym shim khia satia ban maramot ïa katei ka surok, ki la dawa ruh ba lada maramot ïa ka surok ym dei ban trei tang ban dep, hynrei dei ban da thep da ki maw ba heh, hadien pat sa thep sa ki maw kiba rit bad nangta pat sa siang rong bha ïa ka surok, dei ruh ban wanrah da ki engineer kiba la tbit bha ha ka kam shna surok, dei ruh ban pynbun ïa ki kor ki bor (machine) bad ki nongtrei ki ban trei, kumjuh ruh ka NHAI ka dei ban shim khia ban weng noh ïa ka jingeh ha ka jingtwa khyndew kaba ju jia ha ka tunel ha Sonapyrdi kaba ju buh jingeh ïa ki nongleit nongwan, kine ki long ki kyndon ba la buh ba ka NHAI ka dei ban bud.
Ki Waheh Shnong bad ka KSU na Narpuh, ki la byrngem ba lada ka NHAI kam bud ïa kitei ki kyndon ban maramot ïa ka surok, kin shim ïa ka synjam ban khang tala noh ïa ka jaka khrong pisa, Toll Gate, kin khang ïa ka lynti na ka surok national highway ha Narpuh bad ruh kin ujor da ka ejahar pyrshah ïa ka NHAI.
Haba kren sha ki lad pathai khubor, u President ka KSU Narpuh Circle Bah K.S.Suchiang, u la ong, ka jinglong jingman ka surok national highway naduh Mynkre shaduh Malidor ka la sniew shaba palat, la bun sa tang ki thliew ba lang um kum ki pung dohka, bun ruh ki kali kiba la julor bad sniew ha lynti na ka daw ka jing sniew palat ka surok, kumjuh ruh kane ka jinglong ka surok ka buh jingeh bad buh jingma ïa ki nongñiah kali bad ki paidbah kiba leit ba wan, ka buh jingeh ruh khamtam ïa kito ki kali kit nongpang “Ngim lah shah shuh namar ngi la shah ban beiñ shaba palat pud, kane ka jingleh mynti ka sorkar bad ka NHAI ka pynbor ïa ngi ba ngi dei ban leh eiei bad mih shakhmat namar ngi pyrkhat ïa ki jingeh ba ki paidbah ki ïakynduh ha ka leit ka wan, lada ka sorkar bad ka NHAI kim leh eiei ngin shim noh da kawei pat ka synjam.”