Shillong, Naitung 25: Wat lada ka Seng HNLC, ka la wan sha ka miej jingïakren ïasuk, hynrei haduh mynta ka dang dei hi ka Seng beaiñ bad kino kino kiba ai jingïarap ïa ki, yn kheiñ ba kadei ka kam beaiñ ban kin shah kem.
Ïa kane la ïathuh da u IG ki Pulit, u Davis R. Marak, ryngkat ka jingïadon lang u DGP ha ka jingïakren bad ki nongtho khubor mynta ka sngi.
U Davis u la ïathuh ba ka jingsam shithi dawa pisa ha ka kyrteng ka HNLC na ka liang ki Pulit ki dang tohkit. Hynrei uba mih kyrteng ha ki shithi dawa pisa u la wan pynshai sha ki Pulit ba um dei satia ma u bad um ïadon bynta ei ei bad ka jingsam ïa kine ki shithi.
U la ong ruh ba na ka liang ki Pulit ki shu ïoh jingtip ba ki don ki heh spah kiba ïoh shithi dawa pisa na kane ka Seng Kaikhlaw Hynñiewtrep, hynrei lada kine kiba ïoh shithi dawa pisa kim pyntip sha ki Pulit lane kim ïatreilang bad ki, kan eh shibun ïa ki Pulit ban tohkit ne leit kem.
Kumta ki Pulit ki kyntu ïa kiba ïoh shithi dawa pisa ban nym tieng, hynrei ban pyntip beit sha ki Pulit.
