Shillong, Naitung 25: Hadien ka jingshah thombor jong u Myntri Rangbah ka jylla ha ka lah sngi U Blei ha Tura, u Director General of Police (DGP) u Dr. LR Bishnoi, u la ong ba kan sa don ka jingïalang ha Shillong ynda la wanphai u Myntri Rangbah na Tura ban ïakren halor ka jingpynkhlaiñ ïa ka jingpahara ïa u.
Haba ïakren bad ki nongthohkhubor ha Shillong, u DGP u la ong ba ha kane ka jingïalang yn don lang ruh u Myntri ka tnad pohïing, u Chief Secretary bad kiwei pat ki heh sorkar ban ïakren ïa kane ka kam.
“Ngin hap ïashong pyrkhat ban ïakren ïa ka jingpynkhlaiñ ïa ki bor pahara jong u Myntri Rangbah”, la ong u DGP.
Hynnin ka miet ha ka jingïakulmar ha Tura, ki paidbah ki la kerkut ruh ïa ka Mini Secretariat bad ki la kawang maw ruh ïa ka, ha kaba bun ki jingkhang ïit ki la pait bad kim shym la ailad ba u Myntri Rangbah un leit phai sha ïing tad haduh ba ki Pulit ki la tem ïa kane ka jingïakulmar hadien ar kynta ba don ka jingïakawang maw.
