Shen yn pyndep noh ka sorkar ïa ka jngïakren pynbeit bad ki Harijan ban sdang noh ka jing pynkynriah : Dy CM

Shillong, Naitung 19 : Ka sorkar jylla ka la rai ban pyndep noh ka jingïakren ïa pynbeit bad ka Harijan Panchayat Committee (HPC) halor ka jingpynkhreh ban pynkynriah ïa ki 342 tylli ki long ïing na Them Metor, Them ïew Mawlong khnang ban ïoh pynkynriah noh ïa hi shen katba lah sha ka jaka ba la pynkhreh kaba ju buh ïa ka ophis Municipal kaba ha Bishop Cotton Road.
ïa kane ka rai la shim ha ka jingïalang ba la long ha ophis treikam jong u Deputy Chief Minister bah Prestone Tynsong uba dei ruh u Chairman ka High Level Committee ba la don lang ruh da u Deputy Chief Minister ba dei peit ïa ka tnad Urban Affairs bad Municipal ma Sniawbhalang Dhar lem bad ki ophisar.
“ Shen ngin sa pyndep noh ïa kane ka kam namar ki don katto katne ki bynta ba ngi kwah ban ïa pynbeit bad ngi kyrmen ba shen ngin sa pyndep hi ïa kine ruh khnang ban ïoh sdang pynkynriah noh ïa ki” ong u ma Sniawbha.
U la ïathuh ha ka jingïalang kaba la long dang shen bad ka Harijan Panchayat Committee (HPC) ki la kyrpad ïaka sorkar ban pynkylla khyndiat khynsoit ïa ka blueprint bad halor kane ki la ïa shong pyrkhat. “ Hooid ha kato ka por ba ki tyrwa ngim pat lah ban ai jubab mar mar namar ngi hap ban shong bishar bniah bha bad mynta ka sngi ngi la ïakren halor kitei ki jingkyrpad jongki bad hadien kane ngin sa khot ïa ka HPC ban pyntip sha ki ïa ki rai ba ngi la shim. Hooid na ka liang ka HPC ki la pdiang ïa ka blueprint hynrei ki don tang khyndiat khynsoit eh ba ki kyrpad ban pynkylla” ong biang u ma Sniawbha.
Une u Symbud Myntri Rangbah um treh ban ïathuh kiei kita ki jngpynkylla ba ka HPC ka kwah da kaba ong “ Ka jingïakren ïa pynbeit ka dang ïaid sngewbha ïai ap wat kyrkieh shen phin sa ïoh jingtip lut nadong shadong”.
Dang ha ka Sngi Ba ar ka ïing bishar High Court jongka jylla ka la pynmih ïa kawei ka jingbishar bniah jongka da kaba pynpaw ba kane ka kam ban pynkynriah ïa ki Harijan ka la suki palat bad ka shu sahteng. Wat la katta ruh haba shong bishar ka Division Bench ka la pynpaw “ Namar ba ka sorkar jylla bad ki Harijan ki dang ïakren pynbeit ïa kane ka kam shabar ka ïing bishar ban ïa poi sha ka jingïasngewthuh jingmut lang na kata ka daw ka ïing bishar kam kwah ban tuklar”.
La buh ban shong bishar biang halor kane ka mukotduma hapoh hynriew taiew kata ha ka 30 tarik Nailar 2023.