Kner jingïarap ka RBYF sha ka Saiden Secondary School shuwa ban kan leit aireng sha ka State Level Inter School Subroto Cup Football Tournament

Nongpoh, Naitung 18: Kum kawei na ka kynhun seng Bhalang na Ri Bhoi District kaba ju shakri na ka bynta ka dong bad ka thaiñ Ri Bhoi, ka Ri Bhoi Youth Federation (RBYF), Sengkmie mynta ka sngi ka la leit ban ai mynsiem ïa ka kynhun ïalehkai ka skul Saiden Secondary School, kaba dei kawei na ka kynhun ha ka under-17 kaba la shah jied ban leit mihkhmat ïa ka District sha ka State Level Inter School Subroto Cup Football Tournament kaba long ha Nongbah Shillong.
Haba leit ban ai mynsiem ïa katei ka kynhun ryngkat sha ki bor pynïaid skul shuwa ba kin leit shim bynta ban aireng sha ka State Level Inter School Subroto Football Tournament ha Shillong, ka Ri Bhoi Youth Federation (RBYF) ha ka jingïalam u President ba rangbah, u Bah Bipul Thangkhiew ki la noh synniang sha kane ka kynhun da ka tracksuit ryngkat ka song pisa kaba T. 20,000 kum ka jingkyrshan ïa kanne ka kynhun ba kan ioh ban leit shim bynta ha katei ka State Level Inter School Subroto Cup ka ban long ha Nongbah Shillong.
Lyngba jong kane ka sngi, ki nongïalam ka RBYF ki la ai mynsiem ruh ïa ki bor pynïaid skul khamtam ïa kitei ki kynhun ba kin ïalehkai bha bad khamtam ba kin lah ban wan rah ïa ka nam bad ka burom bad kum ki bor pynïaid skul ruh ki la leh burom ïa ki thei ïalehkai kane ka kynhun shi bynta ban kitbok kitrwaing shuwa ba kin leit shim bynta sha katei ka lympung ïalehkai phutbol ka ban long ha Nongbah Shillong.
Ha kane ka jingwan jngoh kyrpang ka RBYF ba la lamkhmat da u Bah Bipul Thangkhiew kum u Presiednt ba rangbah ka seng la don ryngkat naduh u Bah EK Lapang, Rangbah Shnong ka Saiden, u Bah Sumarlang Swer, Coach jong ka kynhun ïalehkai, ki nongïalam ka RBYF, ka Seng Samla Saiden nalor kiwei kiwei ki riew rangbah, ki khynnah skul bad ki nonghikai.
U Bah EK Lapang kum u Rangbah Shnong bad ruh kum u dkhot ka Committee jong ka Saiden Secondary School, haba kren ha kane ka sngi u la pynpaw ka jingkmen kaba khraw ba ki nongïalam ka RBYF Ki la shim lang ïa kata ka jingkitkhlieh ban phaikhmat sha kane ka skul kaba la ioh lad ban mihkhmat ïa ka District sha ka state Level jong ka Subroto Cup bad kum ki bor pynïaid skul ki kynduh shibun ki jingeh ba dang don shibun ki jingduna ha ka skul, hynrei kane ka jingwan ïarap ka RBYF ka la long ka jingmyntoi ïa kane ka skul bad khamtam ïa ka kynhun ïalehkai ka ban mihkhmat ïa ka District sha ka State Level.
Shuh shuh, u la ong ruh da ka jingwan mihkhmat kine ki nongïalam u khmih lynti ba ka long ka jingai mynsiem ïa kane ka kynhun ba kann lah ban poi sha ka thong jong ka jingjop ha ka state level bad na ka state level kan lah ruh ban mihkhmat sha Delhi kaba long hi ka burom jong ka dong bad ka thaiñ Ri Bhoi. Namarkata, u la ai khublei kyrpang ïa ka RBYF ba kan dang lah ban trei shibun ki kam kiba ai jingmyntoi na ka bynta ka dong bad ka thaiñ RI Bhoi bad u khmih lynti ruh ba ka RBYF kan long kawei na ka seng kaba phai khmat shisha na ka bynta ban kyntiew ïa ka dong bad ka thaiñ RI Bhoi ha baroh ki liang.
Haba ai jingkren ha kane ka sngi, u President ka RBYF, u bah Bipul Thangkhiew u la ai ïa ka jingïaroh ïa ki khynnah ïalehkai jong ka Saiden SS bad dei ka jingïatrei lang ka bor pynïaid skul bad ka kynhun ba ki la lah ban poi sha katei ka thong ban ioh mihkhmat ïa ka District sha ka State level jong ka Subroto Cup.
U Bah Bipul Thangkhiew da kaba ai ruh ïa ki kyntien kyntu kynpham, u la ai mynsiem ruh ïa ki bor pynïaid skul ka Saiden SS ba ki la kloi ban pdiang ïa ki jingai sngewbha ka seng bad lehseh kane kan ïarap shibun ïa kaei ka kynhun ba kan dang pynkhreh kham bha ban poi sha ka thong jong ka jingjop.
Ha kane ka sngi, na ka liang ki bor bor pynïaid skul ka Saiden Secondary School lyngba u Principal u Bah James Nongsiej, ha kane ka sngi, ki la ai khublei kyrpang ruh bad ka jingkitbok kitrwiang ruh ïa kito ki riew shimet bad ki kynhun sengbhalang bad kiwei kiwei kiba la kyrshan ïa kane ka kynhun ha kiba bun ki liang katba ki dang shimbynta ha ka lympung ïalehkai jong ka District Level Subroto Cup 2023.