Ka jingim ha kine ki sngi ba jur ka jingbeh por, ka jingbeh sha ka kam, ka jingbanbor ha ak liang ka ïoh ka kot napdeng kiwei de ka pynjur ka jingbanbor ha kiba bun ki briew. Ka jingjur ka jingbanbor ka dei kaba lah ban ktah halor ka bor sngew bad ka bor pyrkhat pyrdaiñ kum ka jingba ym lah ban pynleit jingmut bha, ka jingba ym biang halor ka jingtylliat jingbam, ka jingkhih khuslai, ka jingkiew ka BP bad ki jingshah ktah ha ka liang ka koit ka khiah jong u klongsnam.
Ki don bun ki briew kiba kiar na ka jingshah banbor ka jingmut jingpyrkhat ha kaba sdang ne kiba shu jied ban dih da ki dawai ha ka jaka ban sumar hi dalade. Hynrei ki don kiba dem klet ba ka jabieng ka dei ka bynta jong ka dkhot kaba jur ka jinglong thaiñ kaba treikam lyngba ki nutrient bad ki micronutrient kiba ngi lah ban ïoh lyngba ki jingbam ba ngi bam. Bad ki don ki jingbam kiba lah ban pynduna ka jinglong artatien bad ka jingkhuslai ne ka jingbanbor ka jingmut jingpyrkhat.
Ki jingbam kiba lah ban pynduna ka jingkhuslai bad ka jinglong artatien :
Ka pylleng : Ka pylleng ka dei kaba dap da ka jingdon ki vitamin, mineral, antioxidant bad ka riewspah ha ka jingdon ka choline kaba paw ba ka long kaba kongsan halor ka koit ka khiah ka bor jabieng bad lah ban ïada na ka jinglong artatien bad khuslai.
Ka sha jyrngam ne ka green tea : Ka sha jyrngam ka don tang khyndiat ka caffeine bad don ruh ka amino acid kaba kongsan ba la tip kum ka theanine bad kane ym tang ba ka lah ban ai jingïada na ka bampong hynrei ka kyntiew ruh ka koit ka khiah jong ka jabieng. Ka jingdih ar pela kane ka sha manla ka sngi ka lah ban pynduna ka jingbanbor ka jingmut jingpyrkhat bad ka jinglong artatien.
Ki jait jingbam symbai : Ka carb kaba jwat kaba don ha ki jingbam symbai ka kynthup ka jingdon ki vitamin, mineral bad ka fibre kien ki lah ban pynkiew shipor ka serotonin, ka hormone kaba lah ban pynbha ka jinglong bad pynduna ka jingkhuslai bad ka jingbanbor ka jingmut jingpyrkhat. Lada jur ban don ka serotonin, kito kiba don hapdeng ka jingshah banbor ha ka jingmut jingpyrkhat ki kham lah bor ban pynleit jingmut bad duna ka jingbanbor ka jingmut jingpyrkhat.
Ki soh ehsnep : Ki soh ehsnep kum ki cashew, soh khyllam, u pistachio bad walnut ki dap da ka jingdon ki nutrient bad vitamin kum ka Vitamin D bad magnesium – kine baroh ar ki paw ba don jingïadei bad ka koit ka khiah jong ka jabieng bad pynduna halor ka jinglong artatien, ka jingbanbor ka jingmut jingpyrkhat bad ka jingkhuslai.
Ki soh Citrus : Ki soh citrus kum u soh ñianmtra, sohjew, soh mylleng, soh priam ki riewspah ban don ka vitamin c, kaba paw ba ka lah ban kyntiew ha ka liang ka koit ka khiah ka jabieng bad pynduna ka jingbanbor ka jingmut jingpyrkhat.
U Shynrai : Une u long uwei napdeng ki jait jingshoh ba kiba bun ki ju pyndonkam u don ka curcumin, bal ah ban pynduna ka jinglong artatien bad ka jingbanbor ka jingmut jingpyrkhat da kaba pynduna ka jingkiew ka jingtyrha bad ka oxidative stress kaba ju jia hapdeng ba ki briew ki mad ka jingbanbor ka jingmut jingpyrkhat, ka jinglong artatien bad ka jingkhih khuslai.
Ka doi : Ka doi ka don ki bacteria kiba tei lane ki probiotics kiba ïarap na ka bynta ka jingtylliat jingbam. Kane ka jingbam ka dei kaba lah ruh ban pynduna ka jingbanbor ka jingmut jingpyrkhat ka jinglong artatien.
Ki shoklet kiba ihrong : Kine ki shoklet ki riewspah ban don ka polyphenol, khamtam ka flavonoid kaba ïarap ban pynduna ka neuroinflammation bad ka jingïap jong ki cell ha ka jabieng – kaba lah ban kyrshan halor ka koit ka khiah jong ka jabieng, ka pynduna ka jingkhih khuslai bad ka jinglong artatien.
