Khliehriat, Naitung, 16: Ki Pulit ka Anti-Narcotic Task Force (ANTF) East Jaiñtia Hills District, hadien ba ki la ïoh ïa ka jingtip kaba bniah na ki tnat syntiat ba ki don briew kiba kit ïa u drok, ha ka sngi U Blei ki la pynlong ïa ka jingpynap ktem ha ka shnong Nongsning.
Ha kane ka jingap ktem, ki Pulit ki la ïoh bat ïa kawei ka kali Sumo kamai kaba don ïa u nombar MZ4-A- 2997 bad ki la bat noh ïa ki ar ngut ki kynthei kiba la suba ba ki dei kiba donkti ban kit ïa u drok ha ka met.
Ha ka jingtalasi, la lap ïa u drok uba don ka jingkhia kaba 197.34 gram bad uba shnongdor T1.6 klur.
Da ka jingïatreilang bad ka Khliehriat Women Police Station, ki Pulit kynthei ki la talasi ïa ki ar ngut ki kynthei kiba la suba ba ki kit ïa u drok ha ka met. Na ka met jong kawei ka kynthei la lap 10 tylli ki synduk thep sabon bad na ka met jong kawei pat la lap 20 tylli ki synduk thep sabon ba la thep da u drok.
Kine ki arngut ki kynthei ki dei kiba la tip kyrteng kum ka Hoihoi Hanhal, 35 snem ka rta bad kawei pat kaba la tip kyrteng kum ka Lhing Hohoi, 40 snem ka rta. Kine ki arngut ki dei ki nongshong shnong jong ka Langol, Imphal, West Manipur.
Hadien ba la kem ïa kine ki arngut, ki Pulit ki la kurup noh ïa u drok bad ki la register case ha Khliehriat Police Station bad la pynngat ïa ki hapoh ki kyndon jong ka NDPS Act. Ka jingtohkit ka dang ïaid shakhmat ban lap ksai shuh shuh sa ïa kiwei kiba donkti ha ka kam khaiï drok bad kine ki arngut.
