Hukum u DC ban pynpra ïa 57 tylli ki karkhana saiñ dewiong beaiñ ha West Khasi Hills
Pynpra biang ki bor District sa 3 tylli ki karkhana
Nongstoiñ, Naitung 10: U Deputy Commissioner ka West Khasi Hills Bah Garod LSN Dykes, u la hukum ban pynpra lut ïa kumba 57 tylli ki karkhana coke ba treikam beaiñ ha ka thaiñ Shallang West Khasi Hills District.
Hynrei u la ong ba napdeng kine ki 57 tylli, 14 tylli ki dei kiba la ïoh ïa ka Single Window clearance tangba kim pat don satia ïa ka jingai jingbit ba kin treikam.
Haduh mynta, ki bor District ki la dep ban pynpra haduh 4 tylli ki karkhana ba beaiñ, ba kynthup ïa lai tylli kiba dang shu pynpra hynne ka sngi nyngkong, da kaba shu pynbthei ïa ki atoskhana ba saiñ ïa u dewiong coke.
Haba ïakren bad u nongthoh khubor, u Deputy Commissioner u la pyntip ba kane ka jingpynpra ïa ki karkhana coke ba beaiñ ka la sdang naduh ka 7 tarik Naitung.
U la ïathuh ba katkum ka hukum ba pynmih naduh u bnai Nohprah 2022, ki don haduh 57 tylli ki karkhana coke ba treikam beaiñ ha ka thaiñ Shallang. Hynrei napdeng kine, 14 tylli ki dei kiba la don ïa ka Single Window Clearance tangba kim pat don satia ïa ka jingbit ba kin treikam.
Haba kylli katno tylli ki karkhana ki ban shah pynpra, u Deputy Commissioner u la ong, “Ki don 57 tylli kiba la shem ba ki treikam beaiñ, hynrei 14 tylli ki dei kiba don ïa ka Single Window Clearance. Mynta ngin hap shim shuwa ïa ki jingai jingmut na ka tnad Industries bad ki nongïasaid aiñ jong ngi shuwa ban shim ïa kano kano ka lynti. Kin hap pyni ruh ïa ki kot ki sla kiba donkam baroh”.
Katkum ka jingong jong u, kine baroh 57 tylli ki karkhana ki dei kiba la khang khyrdep naduh u bnai Nohprah 2022. Haba kylli halor ki karkhana ba pynpra hynne ka sngi nyngkong, u Deputy Commissioner u la ong ba ka kynhun na ka Ophis ki la don sha Shallang ban pynpra ïa ki karkhana ba beaiñ, hynrei namar ka jingthut ka mobile network, haduh mynta um pat ïoh satia ïa ka kaiphod.
Na ki tyllong khubor ba ïoh lum, la ïathuh ba haduh 3 tylli ki karkhana ki la shah pynpra biang hynne ka sngi ha ki bor District, hynrei ym shym la ïoh pat ïa ki kyrteng jong kine ki karkhana.
Lah ban kdew hangne ba kane ka jingpynpra ïa ki karkhana coke, ka la wan jia ruh hadien ka jingïai tynjuh jong ka Ïing Kashari Meghalaya High Court ïa ka Sorkar Jylla, halor ka jingkuman ban leh eiei pyrshah ïa kine ki karkhana bad ruh ïa ka kam tih dewiong beaiñ.