Shongkhia ka jingialang ïateh kular ka EJNC bad ka JNC ha Khliehriat, yn tip noh ïa ka EJNC kum ka JNC

Khliehriat naitung 10: Ka East Jaiñtia National Council (EJNC) bad ka Jaiñtia National Council (JNC)mynta ka sngi ka la pynlong ïa ka jingialang ba kyrpang ha Khliehriat West Community Hall bad ha kane ka jingialang la don ka jingïateh kular hapdeng kitei ki ar tylli ki seng bad ruh la thaw noh tang kawei ka kynhun kaba la tip kum ka Jaiñtia National Council (JNC) ka ban ai shuh shuh ïa ka jingshakri ïa ka ri Lum Jaintia bad ïa ka jaitbynriew Hynñiewtrep baroh kawei.
Ha kane ka jingialang la wan ban ïa sakhi lang da ki nongialam jong ki seng bapher bapher ba kynthup ka Hynñiewtrep Youth Council Central Body, ka Hynniewtrep Achik National Movement Central Body, ka Jaiñtia Students Union Central Body, ka Jaiñtia Youth Federation bad kiwei kiwei, kumjuh ruh ki riew rangbah jong ka thaiñ ba kynthup u Dr Phervision Nongtdu, i kong Jhanika Siangshai bad kiwei kiwei.
Haba kren ha ka jingïalang, u Dr P.Nongtdu, u la ai ka jingkhublei kitbok kitrwiang ïa ka Jaiñtia National Council ba kan nang ïaid shaphrang ha ki kam ban shakri ïa ka bha ka miat jong ka ri bad ka jaitbynriew.
U President jong ka Hynñiewtrep Achik National Movement Central Body, u bah Lamphrang Khatbani, u la kren halor ki mat kiba ka sorkar ka thmu ban wanrah kiba long ka jingma kaba khraw ïa ka ri bad ka jaitbynriew.Ha kajuh ka por, u President ka Jaiñtia Student Union, u samla Jersom Shylla, u President ka JYF, u bah O.L.Tariang, ki la ai ka jingkhublei ïa ka JNC bad ki la kren ruh shibun kiei kiei kiba dei ki mat kiba ïadei bad ka ri bad ka jaitbynriew, ki la pynpaw ruh ba kum ki sengbhlang ki ju don bunsien ka jingiatreilang ban ïada ïa ka ri bad ka jaitbynriew bad kin nang ïai treilang ruh kum ki khun ka bri u Hynñiewtrep.
U President jong ka Hynñiewtrep Youth Council, u bah Robert June Kharjahrin, u la shim ïa ka bynta ba ha khmat ha kaba u la pynshkem ïa ki nongkitkam ba thymmai jong ka Jaiñtia National Council.
Ki nongialam bad ki nongktkam jong ka Jaiñtia National Council kiba la pynskhem ha kane ka sngi ki kynthup u President, u bah Sambormi Lyngdoh, Vice President, u bah Ency Shadap bad u bah Nangjan Dkhar, General Secretary, u bah Wanshwa Suting, Assistan Secretary, u bah Almiki Ryngkhlem, Publicity Secretary, u bah Mebanteilang Sukhlain, Finance Secretary, u bah Training Phawa, Chief Organising Secretary, u bah Philip Bamon, Education Secretary, u bah Diamond Bareh, Environment Secretary, u bah Synjay Bareh bad u bah Nini Sungoh, Sport Secretary, u bah Rimiki Dkhar bad u bah Mehun Nongtdu bad kiwei kiwei.
Ia ka jingialang la pyniaid da u bah Damonmi Dkhar bad la pynbyrngia ruh da ki jingshad tynrai na ki khun samla jong ka thaiñ.