Thiah ki nongïalehkai ha ki kamra ba jaboh, pynrem u Pastor K. Pyrtuh, kynnoh ka MSOA ba pynpra jingkhang paiñkhana ki nongïalehkai

Shillong, Jymmang 02: Ka jingpynkhreh jong ka Meghalaya State Olympic Association (MSOA) ha ryngkat ka Directorate of Sports And Youth Affairs ban pynlong ïa ka Meghalaya Games 2022 kala shah kynthoh ha kiba bun na ka jingbym lah ban pynbiang ïa ki jingdonkam na ka bynta ki nongïalehkai kiba wan ban ïashim bynta ha ki jait jingïalehkai ki bapher bapher.
Ha ka sngi Nyngkong la sakhi ïa ka jingsaphriang ki dur lyngba ki social media ïa ka rukom pynkhreh ban pynlong ïa katei ka lympung kaba la i sait met ban peit, ha kaba ki nongïalehkai kila hap ban thiah ha ki kamra kiba jaboh, ka jingbym biang ki jaka sum bad khamtam ki jaka leit shabar kiba ym shym la pynkhuid.
Na ka liang u Pastor Kyrsoiborlang Pyrtuh ha u kyrwoh khubor u la pynrem jur halor ka jingleh jong ka MSOA halor ka jingpynkhreh ban pynlong ïa ka Meghalaya Games 2022.
“Kum u nongshong shnong uba ieit sports bad uba angnud ba ka Jylla kan kiew ha ka sports nga sngewbitar bad pynrem jur.
Ka MSOA ka dei ban shim ka jingkitkhlieh bad kan hap ai ka kaiphod da ka jingthoh halor ka jingpynlut pynsep bad jingpynkhreh na ka bynta ka Meghalaya Games 2022 hadien 14 sngi bala pynkut ïa ka Games,” ong u Pastor Kyrsoibor.
“Kine ki dur kiba pynpaw ïa ka jinglong ki jaka sah ka bym koit by khiah bad kaba i saitmet ïa ki nongïaleh sports kaba ïasyriem bad ka jingtorti ka jingpynkhreh ïa ka Commonwealth Games ha Delhi ha ki snem ba la leit noh.”
“Ka paw shai ba ki synjuk ïalehkai kum ka MSAO bad kiwei kiwei kim don jingthmu ban kyntiew ïa ka sports hynrei ki sngewtynnad tang ban phuh ïalade bad muja ïalade shimet ha ka sngi pynhap pyrda,” la ong u pastor da kaba bynrap bad ïawer ïa kiwei ki nongshong shnong ban pynrem halor kane.
Na ka liang ka Meghalaya State Olympic Association (MSOA) ha ka kyrwoh khubor kala kynnoh ba ki nongïalehkai kila pynpra ïa ki jingkhang paiñkhana kibym shym la pyndonkam shuh.
Ka MSOA hadien ba kala ïoh pdiang ïa ki dur, mar mar kala leit ban jurip ha JN Sporst Complex ha ryngkat ki ophisar bad ka Organising Committee kala rai ban ym pyndonkam ïa kito ki jaka leit shabar kibym shym la pyndonkam shuh mynta lah slem kiban sa pynpra noh ruh ha ka jingshna pynbha ïa katei ka stadium.
“Ngi la pynbiang bad ai pyndonkam tang da ki paiñkhana kiba biang kum ki ‘bio toilet’ ha indoor stadium bad ha ki jaka kilan met. Ki paiñkhana jong ki kynthei ki long kiba bha bad kiba khuid. Hadien ba ngi la ïoh pdiang ïa ki dur mar mar ngi la leit ban jurip bad ngi lap ba baroh kidei tang ki dur kiba ngi la bthah ïa ki nongïalehkai ba kim dei ban pyndonkam,” ong ka kyrwoh khubor na ka MSOA.
“Ha ka jingleit jurip ha ka 2 tarik Jymmang ha ka por 7:20 baje mynmiet ngi la lap ba ki don katto katne ki athlete kila pynpra ïa ki jingkhang jong ki paiñkhana kibym pyndonkam shuh,” ong u Bah John F Kharshiing, Working President bad Co-Chairman Organising Committeena ka MSOA.