Ka jinglong ‘Discipline’ ka lad ban kyntiew ïa une ka briew ha ki kam ba ki thmu : President ka SWKHDSA

Mawkyrwat, Jymmang 2: Ka long ka jingsngewsarong ïa ka South West Khasi Hills District ha kaba ki nongïashimbynta ha ka jingïakop jngi (Swimmer) kiba la ju leit mih khmat ha ka National Games ha ki snem kiba la leit bad mynta ka kynti ruh kin sa leit ban mih khmat ha ka Meghalaya Games 2022 ha nongbah Shillong ha ki tarik 2 haduh 7 u bnai Jymmang, 2022.
Halor kane ka bynta, u President ka South West Khasi Hills District Swimming Association (SWKHDSA), bah Stalyne H. Diengdoh u la pynpaw ka jingaikhublei na ka bynta ïa baroh 23 ngut ki nongïashimbynta ha kane ka jingïakop kiba dei na kane ka Mawkyrwat Block bad kumjuh ruh na Ranikor Block.
Ha kajuh ka por u la pynpaw ruh ba napdeng kine ki nongïashimbynta, ki don ruh kiba la ïoh ka lad ban poi ha ka National Level ruh kiba la dep ban pynlong ha kine ki snem kiba la leit. Kumta kane ka pynpaw ka jingsngewkmen ba kum ka South West Khasi Hills District ka don ïa ki nongjngi kiba tbit shisha bad kyrmen skhem ba ka jingleit jong ki ha kane ka Meghalaya Games 2022 ruh kin sa wanrah ka nam ka burom jong ka jingjop, u la ong.
“Ka jingjop jong ki kan wanrah ka burom nyngkong ïa ki hi, ïa ki kmie ki kpa, ïa ka shnong ka thaw, ka dong ka thaiñ, ka ri bad ka jaidbynriew”, ong u bah Stalyne. Namarkata, kum u President jong ka SWKHDSA u ai ka jingkyrkhu kyrdoh na ka bynta ki khun samla ki ban sa mih ban leit ïa shimbynta ha kane ka jingïakhun ba haba ki leit, leit da ka jingkmen, leit da ka jingkut jingmut, bad long borabor ki briew kiba ryntih (discipline) ha kiei kiei baroh, namar ka jinglong ryntih ka dei kawei na ki lad ban pynkiew ïa u ne ka briew ha ki kam ba ki ki thmu.
U la kyntu ruh ïa ki, ba haba ki don ka sap ïa kaba U Blei U la ai, dei ban pyndonkam hok ïa ka khnang ba ha kawei ka sngi lyngba kane ka kam ïalehkai kum ki khun samla kin sa lah ban kamai jakpoh bad bsa ruh ïa la ka ïing ka sem ha ki sngi ki ban sa wan.
Ha kane ka sngi kum ka dak jong ka jingkitbok kitrwiang ïa baroh ki nongïashimbynta, u President jong ka SWKHDSA u la ai ka jingkhublei kti ïa baroh ki 23 ngut bad u la kyrkhu kyrdoh ruh ïa baroh ki nongïashimbynta ha kane ka Meghalaya Games 2022 kiba dei napoh ka South West Khasi Hills District ba kin sa ïalehkai bha ha ki jaid jingïalehkai bapher bapher bad ba kin ïoh ruh ïa ki met kiba koit ba khiah bad kumjuh ruh kin sa wan phai ha ryngkat ki khunsnam jingjop.