Mawkyrwat, Jymmang 2: Ka lympung ïalehkai kynjatbol na ka bynta ka 1st, 2nd bad 3rd Divisions Football Tournament 2022 ba la pynïaid da ka Tyrsad Area Sports Association (TASA) mynta ka kynti ka la nangïaid shakhmat ha kaba ha ka Bara Football Club bad ka Mawponghong Sports Club ki la ïakhaid mar shi kol hapoh ka Madan jong ka shnong Kyrphei, East Khasi Hills District.
Haba phai ha ka jingïathep kol kaba dei ha ka 1st Division ïa kol na ka bynta ka Bara FC la thep da u Flyness Jaba ha ka minit kaba 78 katba ïa ka kol jong ka Mawponghong SC la thep da u Shembha Langbang ha kaba 68 minit.
Ha ka jingïalehkai jong ka Second Division pat ka Mawliehpoh Football Club ka la shah rem noh da 2 – 1 kol ha ka Mawrohroh Football Club, ha kaba ïa ki kol la thep da u Rimarkos Rani ha ka minit kaba 5 bad na u Mejunstar Rani ha ka ka minit kaba 9 jong ka Mawrohroh SC bad ïa ka kol jong ka Mawliehpoh SC la thep da u Everly Dotni ha kaba 50 minit.
Ha kane ka jingïalehkai watla ka la don ka jingpynthut jong u slap hynrei ka jingïalehkai ka ïaid beit shakhmat bad baroh ar tylli ki kynhun ki la ïaleh katba lah ban ïoh thep kol.
Ka jingïalehkai ha ka Third Division, ka Mawsadang Football Club pyrshah ïa ka Madan Mawser Sports Club, ha kaba ka Madan Mawser SC ka la ïoh ban thep ïa ar tylli ki kol ha ka kyllastep bad na ka liang ka Mawsadang FC ka khlem lah ban pynphai. Dei tat ha ka jingïalehkai jong ka kyllamiet ka Mawsadang FC ka lah ïoh ban pynphai da kawei kol bad da ka jingïakhun tyngeh ki ‘rangïalehkai jong ka Madan Mawser SC ha kaba ki la ïoh ban thep biang ïa ka kol kaba bud. Namarkata, ka Mawsadang FC ka la hap ban shah rem noh ha ka Madan Mawser SC da 3 – 1 kol.
