Sei ki nongïalehkai Gymnastics ïa ka sap ïalehkai ha ka Meghalaya Games 2022

Shillong, Jymmang 02: Ka Gymnastics kaba la pynkhie im biang ha u snem 2018 kala wanphai pura biang ha ka Meghalaya Games 2022 kaba la sdang ha ka 2 tari Jymmang ha SAI Centre NEHU, ha kaba ki nongïalehkai kila lah ban ïalehkai bha bad sei ïa ki sap kiba kyrpang hadien katto katne snem ba khlem ïashim bynta shuh ha ki jingïalehkai.
Da ka jingaiti met bad mynsiem jong ki nongïalam bad ka jingtrei shitom jong ki nongïalehkai kiba dang khie dang san ïa ka Meghalaya Gymnastics Association la lah ban pynkhie im biang ha u snem 2018 ha kaba ha kane ka kynti ba mynta kala ïoh jaka ha ka Meghalaya Games 2022.
Ka Gymnastics ka khlem ïoh rung sha ka Meghalaya Games 2020 bad ka jingwan syllad jong ka khlam Covid-10 kala nang pynthut shuh shuh ban pynkhie im biang ïa kane ka jait jingïalehkai.
Watla katta, ka MGA kala trei shitom katlah katïai ha katei ka por, ha kaba ki khynnah rit kiba thrang bad aiti lut met bad mynsiem ha katei ka jait jingïalehkai kila ïoh ïa ki jinghikai lyngba ki online. Ka MGA kala pynkhreh kyrpang na bynta ki nongïalehkai gymnastics ba kin ïashim bynta ha ki jingïalehkai hala ki jong ki jaka sah, na ka daw ba kam pat biang ki jaka ïalehkai hynrei na ka jingthrang bad jingtrei shitom ki khynnah bad ki hep kiba rit kila la khur takma wat ha ki jingïalehkai national ruh.
Ka MGA kala wanrah ruh da u coach na Manipur u L Baleshwor Singh, uba la pynlut da ki bnai ha Nongbah Shillong ban ai jinghikai na bynta ki khynnah rit.
Ki don arphewsaw ngut ki nongïalehkai gymnastics bad baroh kidei ki kynthei kiba la ïashim bynta ha ki saw tylli ki kyrdan ïalehkai hala ki jong ki jong ki karta, ba kynthup ha ka vaulting, floor exercise bad ka balance beam ha kane ka lympung ïalehkai Meghalaya Games 2022 kaba la pynlong ha Indoor Training Centre jong ka SAI. Ka nongïalehkai kaba khynnah tam kadei kaba la ïashim bynta ha kane ka lympung kadei kaba dang hynriew snem bad kala long ka nongai mynsiem ïa baroh kito kiba la ïashim bynta.
Ha ka jingkhur point kaba 10 point, ka Wandalang Magdalene Malngiang ka khur takma Ksiar ha ka Cat 4 (kaba dei ka nongïalehkai ba la rangbah) ha ka floor exercise. Ka Bakmenhun Shangpliang ba nyngkong ha ka Cat 3, Wansaphi Bernadette Malngiang ha ka Cat 2 bad ka Ruffina Malngiang ha ka Cat 1.
Ha ka vaulting, ka Wandalang Magdalene Malngiang kadei tang ma ka marwei ka nongïashim bynta ha ka Cat 4 hynrei ka khur ïa ka takma ksiar da kaba ïoh 8 point. Ka Josephine Warjri ka wan ba nyngkong ha ka Cat 3 bad ka Sa-i-bakor Tariang ha ka Cat 2.
Ha ka balance beam, ka Ruffina Malngiang ka khur takma ksiar ha ka Cat 1, ka Sa-i-bakor Tariang ha ka Cat 2, Josephine Warjri ha ka Cat 3 bad ka Wandalang Magdalene ha ka Cat 4. Ïa ki takma na bynta ka gymnastics yn sam ha ka 3 tarik Jymmang (sngi Ba-ar).
Haba phai pat sha ka ïalehkai basketball, la pynlong ïa ka jingïalehkai ha indoor stadium, NEIGRIHMS, kaba la pyndonkam ban kheiñ point lyngba ki kor electric nalor kiwei kiwei ki jingpynbna ïa ka jaka ïalehkai.
Ka West Khasi Hills kaba la jop lahduh ha baroh ar ki kynhun (shynrang bad kynthei) ha ka Meghalaya Games 2020, ka kynhun jong ki kynthei kala sdang da kaba khur jingjop da kaba pynliem da 73-17 basket pyrshah ïa ka South Garo Hills ha kaba sdang jong kane ka lympung. Katba ka Ri-Bhoi, kala pynliem da 22-5 basket ïa ka West Garo Hills. Ka East Khasi Hills kala lah ban pynliem da 60-7 pyrshah ïa ka South West Khasi Hills.
Ha ka liang ki shynrang, ka Ri-Bhoi kala jop da 64-35 pyrshah ïa ka North Garo Hills, katba ka East Jaintia Hills kala pynliem da 59-29 pyrshah ïa ka South West Garo Hills.
Ha ka Wushu, kaba la pynlong ha Madanrting, u Pyniohnam Marboh jong ka East Khasi Hills u la pynliem ïa u Habandajop Kharsahnoh jong ka Eastern West Khasi Hills ha ka kyrdan ïakhun sub-junior (boys) ba hapoh 28kg. Ha ka kyrdan 24kg sub-junior (boys), u Sammarbiang Kharsahnoh jong ka EKH u la pynliem ïa u Nangkhraw Kharsyiemiong jong ka EWKH ban khur ïa ka takma ksiar.
Mynta ka sngi yn plie pyrda noh ïa kane ka lympung ha kaba u Myntri Rangbah ka jylla u Conrad K Sangma un long kum u kongsan ha ka jingdon lang u Myntri ki kam ïalehkai ka jylla u Bah Banteisor Lyngdoh uban long kum u symbud kongsan uba dei ruh u President jong ka MSOA. Ïa ka prokram plie pyrda yn pynlong ha madan First Ground jong ka SSA ha ka por 10 baje mynstep.