Shillong, Jymmang 02: Ka Shillong Cricket Association (B) kala pynliem da 62 ron pyrshah ïa ka East Garo Hills ha ka final bad rah syndon ïa ka nam lahduh jong ka lympung ïalehkai Inter District U-19 Boys Cricket Tournament bala pynïaid da ka Meghalaya Cricket Association (MCA) ha ka jingïalehkai kaba la long ha ka sngi Nyngkong ha Tura.
Hadien ba kala jop ïa ka jingkynting pisa, ka SCA (B) kala kam ban tied nyngkong bad ha kane ka jingïalehkai la pynhiar noh sha ka 25 over na ka daw ka jingshah pynthut ha ki bor ka mariang.
U Shubham Rasaily uba ïoh ruh ïa ka khusnam Player-of-the-match u khyrwit marwei 63 ron, ha kaba ka SCA (B) ka buh ïa ka thong ba 152 ron duh noh 9 wicket. U Dipankar Barua u la ïarap kamai 25 ron. U Bilgrak G Sangma udei u rangkawang ba kynsai ha kane ka jingïakhun da kaba khur 3 wicket ai kamai 24 ron ha ki san over. Ha kane ka jingïalehkai san ngut ki rangtied kila khyllem noh lyngba ka run out.
Haba wan beh ïa ka ron, dei tang u Andam Marak uba la kamai bun da 28 ron, u Gulgul Sangma u kamai 10 ron (not out) bad ka kynhun ka khlem kynjoh sha ka thong bad kamai tang 90 ha ki 21.4 over.
U Basant Chettri u khur 4 wicket ai kamai 19 ron bad u Jerimaiah L Kynshi 3 wicket ai kamai 22 ron. Ha kane ka jingïakhun final la wan ban sakhi da u MLA ka North Tura u Thomas A Sangma kum u kongsan bad u Bernard N Marak uba dei u MDC ka Tura kum u symbud kongsan.
Na ka jingkamai ba 100 ron bad khur 7 wicket, u Chwamiki Ryngkhlem jong ka All Jaintia Cricket Association u la ïoh ïa ka khusnam Player-of-the-tournament.
