Balei ban thang ïa ki Ïingmane, skul haba ïakynad jaidbynriew

Nongstoiñ, Naitung, 04: Ar bnai kynthih ki la ïaid naduh ba bthei ka jingïaklumar bad jia ka jingïaum snam ha ka Jylla Manipur, kata naduh ka 3 tarik u Jymmang 2023, buh bah ki mynsiem ba kordor ki la ïap bad da ki phew hajar ngut ki la kylla phetwir. Bun bah ruh ki shnong ki thaw ki la shah wiang ding, ki Ïingmane ki la shah thang bad shah pynjulor, nangta ki skul bad ki jaka pule baroh ki la shah khang lut. Ki hajar ngut ki la shu sah mynta ha ki refugee camp namar ki la hap ban iehnoh ïa la ki shnong ki thaw.
Halor kane ka jingjia kaba sngewsih khamtam ka jingkhlad noh jong ki briew bad ka jingshah thang ki Ïingmane Blei, ki ïing ki sem bad ka jingbym don ka suk ka saiñ, na ka liang ka Balang Catholic Jylla Niam Nongstoiñ (Nongstoiñ Diocese), ka la pynlong ïa ka jingduwai ba kyrpang mynta ka sngi 4 tarik u Naitung 2023 ha Nongstoiñ, ha kaba la donlang ruh u Bishop jong ka Nongstoiñ u Most Rev. Wilbert Marweiñ, ki Phadar, ki Sister, ki khynnah skul, ki nonghikai bad kiba bun ki paidbah.
Ha kane ka sngi la pynlong ïa ka Peace Rally kaba la sdang na Ladweitang hajan Indoor Stadium bad la ïaid paidbah suki suki haduh ka madan New Nongstoiñ, ha kaba la ïoh ruh ïa ka jingïalang kaba lyngkot ha kane ka jaka. Na ka liang ki khynnah skul bad kiwei kiwei, ki la rah ruh ryngkat ïa ki jingthoh kiba pynpaw ïa ka jingsngewkhia halor ka jingjia bad ka jingkhot jingwer ruh ba ka jingsuk kan wanphai kloi noh sha kane ka Jylla.
U Bishop Wilbert haba kren ha ka jingïalang lyngkot u la ong, “ka Diocese baroh kawei ka sngewkhia halor kane ka jingjia, kaba la jia ïa ki hymmen ki para jong ngi kiba don ha ka jylla Manipur. Ngi sngewkhia namar kam don shuh ka jingsuk bad namar kane ka daw baroh kiba ngeit hapoh ka Jylla niam bah jong ngi, ngi pynlong ïa ki jingduwai kiba kyrpang halor kane, namar ngi thrang ïa ka jingsuk ha Manipur”.
“Ngi da sngewkhia haduh katta ïa ki hymmen ki para jong ngi, kiba la duh ïa la ki ïing ki sem, ki jaka puta, ki Ïingmane ki ïing skul. Ngi ieng hangne ban kyrpad ïa ka sorkar lyngba u Chief Minister jong ka Manipur ban wanrah pat ïa ka jingsuk, hapdeng jong kane ka jingjynjar bad jingïakajia jong ki khun ka Manipur baroh kawei. Na ka liang jong ngi, ngi pyrta ba to rah ïa ka jingsuk namar ka jingim briew ka long kaba kordor”.
“Haba ngi phai sha kane ka jingjia, hooid, ka jingïakajia kumba la ïoh sngew ka mih na kata ka jingpynrung ïa ki Meitei ha ka Scheduled Tribe, kaba long kawei ka daw. Kawei pat ka daw ka long ba na ka liang jong ka sorkar ka kwah ban peit ïa kita ki jingdon ki khlaw ban pynlong ri lum. Hynrei, lada peit ïa kata ka jingïakajia hapdeng ki ar jaidbynriew hapdeng ki Meitei bad Kuki, balei keiñ kan wanrah ïa ka jingpynjot ïa ki Ïingmane, balei keiñ kan wanrah ban pynjot ïa ki ïing ki sem,” u la ong.
“Hato kata ka jingïakajia ka pynjot pynban ïa ki ïingmane bad ïa ki skul”, u la ong bad bynrap, “Ka don kaei re kaei shalyndet ka jingthmu jongno re jongno, kiba thmu ban pynjot pyntroiñ kiba wanrah ïa ka jingïakajia bad jingïaumsnam hapdeng ki para Tribal. Ki don bun ki briew ba sniew shalyndet kiba kwah ban pynïakajia hapdeng jong ngi ki Tribal ban pynïaumsnam bad ïa shoh ïa dat iwei ïa iwei pat bad kin rkhie pat sha lyndet”.
“Ngi dei ban husiar namar kane ka dei kaei kaei kaba la thmu na shalyndet kaba ngim lah ban shemphang ba kum kane ka jingïakajia hapdeng ki Meitei bad Kuki ka jia. Hynrei ha lyndet hi ka don ka jingthmu kaba sniew ban pynjot ïa ki khun Khristan bad ki Ïingmane. Ngi dei ban mih bad dawa ba dei ban pynkut ïa kine ki kam klumar bad ban pynjah burom ïa ka North East baroh kawei”.
“Ngi kum ka Diocese ngi kyrpad ïa ka sorkar pdeng bad ïa ka sorkar Manipur, ba ki dei ban wanrah noh ïa ka jingsuk ha Manipur bad ban pynsangeh noh shisyndon ïa kane ka jingïaumsnam. Ngi duwai ïa ka jingsuk ba kin don ki lad ki lynti ban ïoh biang ka jingsuk ha Manipur. Ngi duwai ba u Blei un pynsngew ïa ki briew kiba peit kiba khmih bad kita kiba don ha ka bor, ba ki dei ban pynsangeh shisyndon ïa kum kane ka jingjia umsnam, kaba ym lah ban pdiang ha ka imlang sahlang”, ong u Bishop Wilbert Marweiñ.
Kiwei pat kiba la ai jingkren ha kane ka jingïalang ki long u Bah Marcel Myrthong bad ka Kong Yondalin Nongkynrih, kiba la pynsngew ïa kajuh ka phang ban kyntu sha kiba ngeit baroh ban pynlong ïa ki jingduwa ba jar jar ba u Blei un pynphai pat ïa ka jingsuk sha ki paidbah nongshong shnong jong ka Jylla Manipur.
Kumjuh ruh la pynlong ïa ka jingduwai ha kaba la ïalam da u Phadar Nicholas Maiong bad shwa ban pynkut noh ïa ka jingïalang, la ïoh ïa ka jingduwai kyrkhu kyrpang da u Bishop Wilbert Marweiñ.