Ïa kynduh u heh BJP ïa ki nongïalam party ha Ri Bhoi shi bynta ban rakhe dap 9 snem ka jingsynshar ka BJP

Nongpoh, Jylliew 28: Uwei na u heh nongïalam ka BJP, u Dr. Dilip Kumar Jaiswal bad uba dei ruh u dkhot ka Bihar Legislative Council mynta ka sngi u la wan ban ïa kynduh kyrpang ïa ki nongïalam bad ki nongtrei ka party BJP ha Nongpoh shi bynta kum ka jingrakhe ïa ka jingdap 9 snem ba la synshar da ka party BJP ha ka ri India ba la ïalam da u Narendra Modi kum u Myntri rangbah duh ka ri India.
Haba wan ban iuh kjat mynta ka sngi ha Nongpoh, la pynlong ruh ïa ka jingïakynduh lang ki nongïalam ka party ha Gladden Tower Nongpoh ba la don ryngkat naduh u Bah David Kharsati, u P.S Toor, Ka Kong Marian Maring, u Dr. Evarist Myrsing kiba dei ki nongïalam ka BJP ha ka jylla bad kum ki nongïalam ki la ioh lad ban ïa phylliew jingmut bad ban ïa kren halor shibun ki bynta kiba dei jong ka party bad ruh ban ïa kren na ka bynta ka jingmyntoi ki paidbah ha kane ka District bad jylla hakhmat une u heh nongïalam ka BJP.
Haba kren ruh ha kane ka sngi, u Dr Dilip Kumar Jaiswal, u la pynpaw ka jingkmen ba u la ioh lad ban wan jurip sha kane ka jylla Meghalaya ba mynta ka sngi u la wan ban iuh kjat ha Nongpoh bad kum u nongïalam ka BJP u la pynpaw ba kane ka jingwan jong u ban iuh kjat sha kane ka jylla ka dei shi bynta ka jingrakhe ïa ka jingdap 9 snem naduh ba la synshar da ka BJP ba la lamkhmat da u Narendra Modi kum u myntri rangbah ka ri India.
U la pynshai ruh sha ki paidbah ba ka sorkar BJP tang hapoh ka 9 snem ha ka jingïalam u Narendra Modi kum u myntri rangbah ka ri, ka la lah ban wan rah shibun ki jingkylla hapoh ka ri India hi baroh kawei bad ha ka jingïalam u Narendra Modi ka sorkar ka la leh shibun ki kam pynroi naduh ka kam ban kyntiew ïa ka koit ka khiah, ki lynti ki synkien, ki umbam ki umdih, ban kyntiew ïa ka ioh ka kot, ka jingpynkup bor ïa ki samla bad kiwei kiwei ki kam ba radbah ba la leh da ka sorkar BJP.
Shuh shuh, u la ong ruh ba ka party BJP kan dang bteng ban trei na ka bynta ki paidbah ha kaba ha ka jingïalam u myntri rangbah ka Ri, u Narendra Modi kin dang wan shibun ki jingkylla, ha kaba ka thong jogn ka party BJP ka dei hi ban wan rah ka jingkylla ha baroh ki liang hapoh ka ri India hi baroh kawei.