Nongstoiñ, Jylliew 26: Kum shibynta jong ka jingrakhe ïa ka International Day Against Drug Abuse & Illicit Trafficking 2023, ka ophis jong ka District Social Welfare Officer, West Khasi Hills District Nongstoiñ, hynne ka sngi ka la pynlong ïa ka prokram pynsngewthuh paidbah halor ka phang “People first: stop stigma and discrimination, strengthen prevention” lane ‘Ka mynsiem briew kaba tam: sangeh ka peitkynriang bad ñiewbeiñ, pynkhlaiñ ïa ki lad jingïada’.
Ïa kane ka prokram la pynlong ha ka skul St John Bosco Higher Secondary School, Rambrai, ha kaba la sakhi ïa ka jingïashimbynta shitrhem jong ki khynnah na ki skul kiba pher bapher jong ka thaiñ Rambrai ha ka jingïaid rally pyrshah ïa ki drok. Ka rally ka la sdang na ka skul United National Secondary School, Mawrang ter ter shaduh Iew Rambrai. La pynkut ïa kane ka jingrakhe da ka prokram pynsngewthuh paidbah ha St John Bosco Higher Secondary School, Rambrai halor ka jingma kiba mih na ka jingdih drok.
U BDO jong ka Rambrai Block, u Bah S. Marweiñ u la u kongsan ha kane ka prokram. Ha ka jingkren ka jong u sha ki khynnah skul, ki nongtrei ASHA, ki nongtrei Anganwadi bad paidbah jong ka thaiñ Rambrai, u la kyntu jur ïa baroh, khamtam eh ïa ki khynnah skul ba horkit hordang kim dei ban ngop ha ka jingdih drok. Namar u drok u ai jingkmen tang shi por, lait nangta sa tang ki jingeh kin wan ban tap ha ka jingim ka jong ki.
U la ong ba ki khynnah skul ki dei ban trei shitom bad minot thop ha ka jingpule ka jong ki, khnang ba ki lah ban tei pynbha ïa ka imlang ka sahlang. U la ban ruh ba ka jingpyndonkam ïa u drok ka ktah ïa ka met ka phad, ka jingmut jingpyrkhat, ïa ka imlang ka sahlang bad ka ktah ruh ïa ka ïoh ka kot. Kumta donkam ban rat diengkhong ïa une u jingsniew napoh ka imlang ka sahlang.
Ha kane ka sngi, u kongsan u la ïoh ruh ban pyllait paidbah ïa kawei ka sur jingrwai kaba la rwai da I Kong Joymery Khardewsaw, ïa kaba la ïarap pynmih da ka ophis jong ka District Social Welfare Officer Nongstoiñ. Kane ka sur jingrwai ka ïawer bad kyntu ïa baroh ba kin kiar na ka jingdih bad pyndonkam ïa u drok.
Ïa kane ka prokram la pynïaid da I Kong S.Ïawphniaw ha ka jingdon ryngkat jong I Kong V.C War, District Social Welfare Officer, West Khasi Hills District I ba la ïalam ban pule ïa ki jingkular halor katei ka phang pdeng ha baroh kiba wan ïashim bynta ha katei ka prokram.
Kiwei kiwei pat ki riew shemphang kiba la ïadon bynta lang ha katei ka prokram pynsngewthuh paidbah halor u drok, ki kynthup ïa I Kong I.Shadap, Clinical Psychologist, Nongstoiñ, U G.K Sangma, Inspector of Police, bad I Kong G.Thongni I ba dei I Counselor jong ka Kripa Foundation. Ha ka jingkren ka jong ki, ki la kyntu bad wer lang ïa baroh ban kiar na ka jingdih droks.
