Ai burom u Bah Pynïaid ïa ki Ex CEM hadien ba jop suk ïa ka shuki CEM

Shillong, Jylliew 20: U Bah Pynïaid Sing Syiem, MDC ba la ar samoi jong ka Sohryngkham, mynta ka sngi, u la shimti kum u Chief Executive Member (CEM) ba sawphew wei jong ka KHADC.
Kane la long hadien ba u Chairman ka ïingdorbar u Bah Lamphrang Blah, u la pynbna ba u Bah Pynïaid u la jop khlem don nongïaleh pyrshah ïa u.
U Bah Pynïaid u la jop nyngkong eh kum u MDC ha ka snem 2014 na ka Seng HSPDP ha ka por ba u Bah Ardent Miller Basaïawmoit, u dang long President. Ha katei ka snem ba u jop nyngkong u la bat ïa ka shuki Deputy Chairman bad i Kong Teilinia Thangkhiew kum ka Chairman. U Bah Ardent u la long kum u CEM. Ha ka snem 2019 u la jop MDC na ka Seng NPP bad ha ka elekshon shiteng samoi sha Assembly ha u snem 2021, hadien ka jingkhlad noh u Bah David Nongrum, u la jop na ka Seng NPP. Hynrei u la shah rem noh ha ka elekshon MLA 2023. U la bat ruh ïa ka shuki Chairman bad kumjuh ruh kum u Deputy CEM ka KHADC.
Haba kren ai khublei ïa ki dkhot hapoh ïingdorbar hadien ba ki dkhot ki ladep kren ai khublei ïa u, u Bah Pynïaid, ula ong ba u dap ka jingsngewkmen ban shimti ïa kane ka shuki CEM, namar ba u la ïoh lad ban ïatreilang bad ki hynriew ngut ki CEM ha shuwa jong u. “Nga la ioh lad ban ïatreilang kum u MDC naduh ba long CEM i Bah Ardent Basaïawmoit, Bah Adelbert Nongrum, Bah Pynshngaiñ Syiem, (L) Bah HS Shylla, Bah Teiñwell Dkhar bad kumjuh ruh i Bah Titosstarwell Chyne”, la ong u MDC Sohryngkham.
U la ong ba lyngba kane ka jingïatreilang bad ki, kan long ka jingmyntoi kaba khraw ïa u ha ka jingtreikam namar ba kidei ki nongïalam kiba la tbit ha ka kam. U la ong ba ka kam kaba hakhmat eh ïa ka EC ba thymmai ka long ban pynkhreh ïa ka mangtyngka kaba dang sah jong une u snem mang tyngka ba mynta. U la ong ruh ba ka EC kan shimkhia ïa ka jingpynrung ïa ka ktien Khasi ha ka Khyrnit kaba phra jong ka riti synshar ka ri India, ka jingshongsuk ha ki shnong khappud, ha kaba i la phone ruh ïa u CEM ka Karbi Anglong ban kyntu ïa u ban peit ba ki paidbah ha Raid Nongtung kin nym shah pyndik.
“Shuwa ban wan sha District Council, nga la phone ïa u CEM ka KAAC ban peit ba ki paidbah ha Raid Nongtung kim dei ban shah pyndik”, u la ong , da kaba bynrap ba shen un sa leit jngoh ïa kane ka thaiñ ryngkat ki MDC.
U la ai ruh ka jingïaroh ïa ka sorkar MDA kaba la thung da ka Expert Committee ban peit bniah ïa ki BIl ba ju phah da ka District Council, namar baroh shi katta ki Bill na District Council kat shaba phah sha Secretariat ki shu long tang ki kot jot ha District Council Affairs. “Hynrei lyngba kane ka Committee, nga ngeit ngin lah ban phah ïa ki Bill sha u Lat ha kaba un shu soi beit khlem da don jingartatien”, u la ong.
Ha shuwa jong kane, kiba bun dkhot ki la ïeng ban ai khublei kitbok kitrwiang ïa u Bah Pynïaid ha ka jingshimti jong u ïa ka kam Chief Executive Member jong ka KHADC.
Ha shuwa ba un shimti ban shong ha ka shuki CEM ha kamra treikam, u Bah Charles Marngar, MDC- MLA ka Mawhati na ka Seng Congress u la ïalam ïa ka jingduwai ha kaba la ïadon ryngkat lang ki MDC jong ka Liang Synshar, nangta u Bah Bindo M. Lanong, ki ophisar bad ki nongtrei ka District Council.