Byrngem u CEM thymmai ïa ki nongkhaïi bar jylla ba khaïi beaiñ ha u pud ka Council

Shillong, Jylliew 20 : U Chief Executive Member ba thymmai ka KHADC, Bah Pynïaid Sing Syiem ha ka sngi Ba-ar u la byrngem ba un leh da kaba tyngeh ïa ki bar jylla ki pynïaid ïa ka khaii pateng jong ki khlem da bud pyrkhing ïa ki kyndon jong ka District Council.
“Nga kwah ban ai ka khubor kaba tyngeh sha ki nongkhaïi bar jylla ba kim dei satia ban khmih lynti ba kin lah ban bteng ïa ka khaïi pateng jong ki ha u pud u sam jong ka Council khlem ka Trading License. Ngin bteng ban khynra ïa ki nongkhaii bym don trading license katkum ki kyndon jong ka Trading by Non-Tribal Regulation Act bad ngin khang wat ïa ka kam khaii pateng jong ki ruh,” la bynrap shuh shuh u Bah Pynïaid haba kren bad ki lad pathai khubor hadien ba la shimti kum u CEM.
Nalorkata, u CEM u la ong ruh ba ka EC kan sa shim ïa ka rai kaba khatduh lada ka por ka por ban rai la kin ai ne kin ym ai shuh ïa ki trading license sha kito kiba aplai ne kwah ban pynthymmai biang ïa ki license jong ki. U Bah Pynïaid u ong ruh ba kane ka EC ba thymmai kan ym ai No Objection Certificate (NoC) na ka bynta ka jingshna ïa ka lynti rel ha Ri Bhoi.
Lah ban kdew hangne ba ki sengbhalang ki ieng pyneh triang ban wanrah ïa ka lynti rel katba ym pat don ïa ki ain ki kyndon kiba biang ban ïada na ka jingrung kyrthlep ki mynder sha ka jylla.