Ngam tip ïa ka daw ba ki MDC ki pynkyllem ïa ka EC ha KHADC namar ngi ai laitluid ba kin trei : Prestone

Shillong, Jylliew 20: U Symbud Myntri Rangbah ka jylla uba peit ruh ïa ka tnat ka District Council Affair ka jylla u Bah Prestone Tyngsong u la kyntait war ïa ka jingdonkti ka sorkar ne ma u kum u Myntri ka tnat ban pynkyllem ïa ka Executive Committee ha Khasi Hills Autonomous District Council hynrei u la ong ba ka dei beit ka rai laitluid jong ki MDC jong ka NPP namar ka jingtreikam ki MDC ki laitluid khlem shah teh ha ka sorkar.
“Ka saiñ pyrthei ha KHADC ka dei ka bym donkano kano ka party ruh namar ki MDC ki lah ban rung ban mih party katba ki mon,” ong u Bah Prestone ha ka jingïakren bad ki lad pathai khubor.
Kane ka jingkren jong u Bah Prestone ka long shisngi hadien ba National People’s Party (NPP) lyngba jingkyrshan ka Congress ka la pynkhyllem ïa ka Executive Committee ba la ïalam da ka UDP lyngba u Bah Titos Chyne.
Haba ïadei bad ka daw ba ki MDC ka la pynkhyllem ïa ka EC u Bah Prestone u la ong ba um tip na ka daw aiu.
“Hooid nga dei u myntri jong ka tnat DCA bad ka kamram jong nga ka dei ban peit ïa ka bit ka biang jong baroh lai tylli ki district coincil ha ka jylla bad kam dei ka kamram jong nga kum u myntri ban pynkhyllem ïa kano kano ka EC hynrei ka dei ka hok ki MDC jong kine kine ki District Council ban jied ïano ki kwah ban thung nongïalam,” u la ong.
Na ka liang u President ka UDP hynnin ka sngi u la pynpaw ïa ka jingbym sngewtynnad ïa kane ka jingleh ka NPP ban pynhap ïa ka EC ba la ïalam da ka UDP haba ïadei bad kane.
Haba kylli ïa u Bah Prestone la kane kan ktah ne em ïa ka jingïadei hapdeng ka UDP bad ka NPP ha ka sorkar, u Bah Prestone u la ong ba kane kan ym ktah eiei.
“Ka jingïatreilang kan ym ktah eiei namar kam don jingïadei eiei hapdeng ka District Council bad ka sorkar jylla namar ki don la ki bor treikam ba laitluid,” u la ong.