Shillong, Jylliew 20: U Bah Bindo Mathew Lanong, Nominated MDC ka KHADC, u la ong ba ha ki Autonomous District Council hi lada phi nang phi stad, phi tbit treikam katno katno ruh, ynda la dei ka por ban khyllem phin khyllem beit.
Haba ïashim bynta ha ka jingïakren ai khublei ïa ka jingshah jied CEM u Bah Pynïaid Sing Syiem mynta ka sngi, u MDC ba la rangbah duh jong ka KHADC, u la ong ba ym lah leh eiei namar ba ka la ju jia kumne na ka por sha ka por. U la pynpaw ruh ka jingsngew kyndit haba u wan rung hapoh ïingdorbar ba ka jaka shong jong u kam don shuh hajuh, hynrei ka la don shawei.
U la pynkynmaw ba u ïalade ruh u ïoh long CEM tang phra bnai bad shah pynkhyllem noh bad u Bah Pynïaid ruh katkum ka samoi un ïoh bat ïa kane ka shukim kumba phra bnai.
Haba kren ai khublei ïa u CEM thymmai, u Bah Bindo u la ong ba u ithuh bha ïa ki kmie ki kpa u Bah Pynïaid bad kadei ka ïing kaba ïa kit ïa bah ïa ka imlang sahlang. U la ong ruh ba u Bah Pynïaid udei ruh u briew uba biang ban shimti ïa kane ka shuki namar ba u la bat bun ki kam kum u MDC.
U CEM barim, u la pynkynmaw ïa ka jingdonkam ka District Council ha kaba wat ki briew kiba na shabar, kynthup ïa kiba na shabar ri ruh ki tip bad ki ithuh ïa ka District Council hangne, namar kadei kaba nyngkong eh ban don ha ri India.
U la ai burom ruh ïa u Rev. JJM Nichols Roy uba la ïasaid tyngeh ha ka Committee jong ka Constituent Assembly ban thaw ïa ki District Council ban ïada ïa ki Riewlum, wat hapdeng ka jingpyrshah kaba jur na ki nongmihkhmat ha Assembly. “Nga ai ka jingïaroh ïa ka jingïohi jngai jong u Bah Joy bad nga nud ban ong ba ym pat don uno uno u nongïalam na ka jylla uban kham khraw ban ïa u Bah Joy.
