Nongpoh, Jylliew 20: Uwei u heprit ba dang 9 snem ka rta mynta ka sngi u la duh noh syndon ïala ka jong ka jingim hadien ba u la ngam jyllop ha Wah Umtrew, kaba hap haka shnong Amtola Byrnihat.
Katkum ka khubor bala ioh lum la ong ba kane ka jingjia kala jia mynta ka step haka por 10 baje eiei, ha kaba utei u heprit bala tip kyrteng kum u Asabul Ali u dang ïalehkai bad ki para bad paralok harud jong katei ka Wah Umtrew hynrei, kyndit kynsan namar ka jingbtuid utei u hepritu la hap syndon shapoh Wah, bad watla ki don ki nongtong dohkha ha katei ka wah kim lah shuh ban ïarap namar ka jingheh bad jingkhlaiñ ka um.
Shuh shuh halor katei ka jingjia ka para jong utei u heprit kala mareh bran bran ban leit pyntip bad ïathuh shala iing ïa katei ka jingjia, bad mar mar kila pyntip sha ki pulit Assam kiba la phah ïaki Emergency and Rescue Team ban ïarap ïa utei u heprit hynrei namar ka jingslem, ki pulit kim lah shuh ban leh eiei haduh ba utei u heprit ula duh noh syndon ïala ka jingim bad ki pulit kila ioh ban sei ïaka met tad haduh ka por 1 baje noh phai sngi bad ban pyndep ïaki jingdonkam baroh hadien bala aiti noh ïaka met utei u heprit sha ki bahaiing.
