Ïam kthang ki para nongrwai Kids Tarari ha ka sngi ba leit on khatduh

Nongstoiñ, Jylliew, 19: Wat hapdeng ka jingpynthud u lapbah lapsan, ki paidbah kiba sngewlem ki la tuid ha ka sngi leh burom khatduh ïa ki met ïap jong ki ar ngut ki heprit kiba dei ki shipara, kata ka Maïanylla Nongsiej 10 snem bad ka Cafinïa Nongsiej 15 ka hymmen jong ka, kaba dei ka ruh ka dkhot nongrwai ka Kid’s Tarari Choir Nongstoiñ.
Ha kane ka sngi ka ïing ryngkat ka balang ka la ïoh ban pyndep ïa ka jingleh-niam ba khaduh bad la ïoh jingkren na ki para klas ka Maïanylla, na ki para klas ka Caffinia kiba na ka skul St Peter’s Pyndengrei, ki dkhot ka jingïaseng khynnah Balang Presbyterian Mawlangniang, ki dkhot ka Jingïaseng samla Balang Presbyterian Mawlang-niang, na ka nonghikai ka Kids Tarari Choir Nongstoiñ bad na ka ïing ka sem ba la pule ruh ïa ka history kaba lyngkot.
Ha katei ka sngi shuwa ban leit ontep don burom ïa kitei ki heprit kiba la khlad noh namar ka jingshah tap ban ha ka khyndew, kaba la jia myn ha ka sngi saitjaiñ jong ka taïew, ki paidbah kiba la leit ban ai mynsiem lem ki la ïam lang haba ïoh sngew bad ïohi ïa ki dkhot jong ka Kid’s Tarari Choir Nong-stoiñ kiba la kynud ïa ki sur ba sngew myllung lyngba ki kyntien jingrwai kaba la thaw kyrpang kaba la jer kyrteng “Jlang Ki Her”.
Mar syn rwai baroh ki ummat ki tuid na ki ngap jong ki paidbah kiba ka tuid ban sngew synei halor kane ka jingjia ba sngewsih. Tangba ha kiba bun hi ka khubor ba shai ka long ba kine I heprit ki la don pat mynta ha ki ksang kti ba sbun ba ieit bad ba thep mynsiem jong u Blei.
Hadien ba la ïoh ban pyndep ïa ka jingleh niam kaba khatduh, la rah ïa ki metïap jong kitei ki heprit bad la ïoh ban tep don burom lang ha kajuh hi ka thliew ha lum jingtep jong ka Balang Presbyterian Mawlang-niang kawei na ki shnong kaba don ha ka thaiñ Urkali Nongstoiñ.