Nongstoiñ, Jylliew, 17: Ka jingbym lah pynpoi dohkha shuh ha kine ki sngi na kiwei pat ki jylla ba na shabar sha Meghalaya, ka la pynlynga ïa ki paitbah nongbam namar ka doh masi bad ka doh sñiang ruh la shah khang ban die, la ha shnong ne ka ïew ha hat bad ki dohkha ba lah ban ïoh ha ïew ha hat ruh, ki dei satang ki dohkha kiba pynmih napoh ka jylla.
Haba phai sha ki nongdie ïa ki dohkha ha West Khasi Hills, dei tang ki nongshong shnong ka thaiñ Sangriang kiba ju pynmih dohkha mih dohkha man ka sngi. Hynrei ka dor pat ka kham rem ban ïa ki dohkha kiba la pynpoi na kiwei pat ki jylla. Nalor kata ki dohkha ba ki nong Sangriang ki ju pynpoi ha Nongstoiñ ki dei ki khasaw bad ki doh jei tangba lah ban ïoh tang ha kine ki aïom slap.
U bahnah Kharbani na ka shnong Sangriang u ba ju die ïa ki dohkha saw doh jei bad ki jhur ki soh, haba kylli ba ïa ki dohkha ba u ju die u leit tong hi ne u shu thied na kiwei. U la ong ba u shu thied na ki para shnong kiba ju leit tong na wah bad um ju thew kilo, hynrei u shu suh ha u siej ki sa die ha ki dor ba ïapher katkum ka jing rit jingheh ki dohkha bad ïa ki doh jei ruh kumjuh.
Haba phai pat ha ka jingdon ki pung ka ha kine ki snem, ym lah ban len ba West Khasi Hills ka dei kawei na ki District kiba bun tam ki pung dohkha. Hynrei kan dang shim por slem bha kat haduh ba ki nong ri dohkha hapoh ka District kin lah ban pyndap wat tang ha ki nongdie doh kha ha sor Nongstoiñ. Ym lah ban len ba wat haduh mynta ym pat ju ïoh sngew ba ki nongshong shnong shnong kiba don pung dohkha ki pynmih ban shalan sha ïew.
Haba pyrshang ban twad jingmut na ki nongshong shnong ki la ong ba imat kiba don pung dohkha kim kwah satia ban kamai da kaba ri dohkha ban die ha ïew ha hat, hynrei ka jingthmu jong ki ban shna pung ka long beit ban ai wai ha kito kiba ju pynlong ïa ki jingïakop khwai.
Haba phai ha ka kam ri dohkha ha ki snem ba la dep, ka sorkar ka la pynbna da kata ka skhim ba kyrpang kaba la tip kum ka Aqua mission bad ha ka jingshisha lyngba katei ka mission, ka sorkar ka la dei ban phah ïa ki riew shemphang ha ka kam ri dohkha ba kin ai jinghikai lyngba ki prokram haman la ki District na ka bynta ki nongri dohkha, ban pynsngewthuh ïa ki kumno ban shalan sha ki ïew ki hat jong ka jylla, na ka bynta ban kyntiew ïa ka ïoh ka kolt ym tang jong ki nongri dohkha hynrei na ka bynta ki nongdie ruh.
