Nongstoiñ, Ïaïong 29: Ki katto katne ngut ki longkmie kiba dei ki nongshong shnong jong ka thaiñ Kynroh, ki la pynpaw ïa ka mynsiem ka jingkmen bad sngew phuhmat, hadien ba ki la ïoh sngew ba la pynkiew kyrdan noh ïa ka Nongkynjang Sub Center sha ka Public Health Center (PHC).
Haba ïadei bad katei ka phang na ka liang jong kitei ki longkmie haba ïakren bad u nongthoh khubor, ki la pynpaw ïa ka jingsngewnguh ïa ki bor kiba halor kiba la sngew lem ïa ki jingdonkam na ka bynta u paidbah jong katei ka thaiñ. Ki la ong ruh ba ïa katei ka jingpynkiew kyrdan na ka sub center la lah ban tip lyngba ka jingpynbna jong u MLA ka Nongstoiñ konstitwensi, ha ka jingïalang kaba la pynlong dang shen ha shnong Nongkynjang West Khasi Hills District ïa kaba la tip ruh kum ka Health Mela.
Ha ka jingïakren bad u Doctor Tylli Syiem pat u la ong, “Namar ba la pynkiew kyrdan noh sha ka PHC, shen ha katei ka jaka sumar nongpang, yn don noh kumba 10 tylli ki jingthiah na ka bynta ki nongpang. Yn don ruh haduh 2 ngut ki Doctor kynthup ïa u Doctor Ayush bad uwei u Doktor u ba la pyndep MBBS”.
U la ong ruh, “Yn don kham bun ngut ki Nurse bad yn lah ruh ban pynthiah ïa kiba pang kiba shitom jur. Kan long ruh kum kawei na ki Hospital bad shibun kiwei kiwei pat ki jingdonkam na ka bynta kiba thiah pang, ki nongwan shim dawai bad kiwei kiwei yn lah ban ïoh na katei ka jaka sumar nongpang”.
Kumban shu pyntip ba lada katei ka PHC kan urlong, kan wanrah jingmyntoi ym tang ïa ka shnong Nongkynjang. Hynrei kan long na ka bynta ki 30 tylli ei ei ki shnong kiba don ha katei ka thaiñ kiba kynthup ïa ka shnong Nonglwai, Nongkhlaw, Mawthungkper bad kiwei kiwei. Kan pynsuk ruh shibun ïa ki nongshong shnong jong katei ka thaiñ kiba don kumba 20 hajar ngut ei ei ki paid nongshong shnong, ba kin lait na ka ban ïabeh sha sor Nongstoiñ khamtam ha ka miet ka ïong.
