Nongstoiñ, Jylliew, 15: Ki ophisar ka tnad Development of North East India (DoNER) jong ka Sorkar pdeng kiba kynthup ïa ka Joint Secretary, ka Anuradha Chagti bad u Under Secretary, u Pankaj Sharma, myn ha ka sngi balang jong ka taiew ki la wan jngoh ïa ka West Khasi Hills District ban ïakynduh ïa ki nongïoh bhah na ki skhim bapher bapher, ban ïa phylliew jingmut ruh bad ki ophisar na ki tnat sorkar kiba ju pyntrei ïa ki skhim kiba hap hapoh ka prokram SAMBHAV (Saturation of model Blocks & Villages) jong ka Sorkar pdeng.
Ha kane ka sngi, ki ophisar ka tnad DoNER ha ryngkat ka jingsynran lang jong u Deputy Commissioner ka West Khasi Hills District, u Bah Garod LSN Dykes, ki ADC, ki BDO bad ki ophisar jong ki tnad sorkar bapher bapher, ki la leit ha ka shnong Nongkhniang kaba hap hapoh Block Nongstoiñ bad ha ka shnong Riangdim kaba hap hapoh Block Mawshynrut, ha kaba ki la ïoh ban ïakren bad ïaphylliew jingmut halor ka jingpyntreikam ïa kiba bun ki skhim ka Sorkar pdeng, kiba kynthup ïa ka skhim Jal Jeevan Mission (JJM), Mid-Day Meal, Pradhan Mantri Awas Yojana (Gramin), PDS bad kiwei kiwei. Ka la don ruh ka jingïaphylliew jingmut kaba markylliang hapdeng ki nongshong shnong bad kine ki heh sorkar, ban kham pynleit jingmut bad pynjanai shuh shuh ïa kiwei pat ki bynta jong ka roi ka par, kiba kynthup ïa ki lynti ki syngkieng bad ka pule ka puthi na ka bynta ka jingmyntoi jong ki paidbah nongshong shnong ka thaiñ.
