Shillong, Jylliew 14 : U nongïalam ka BJP ha ka jylla ba dei ruh u Myntri ka sorkar jylla, Bah AL Hek ha ka sngi Balang u la ong ba ka party kan pynkhreh ban sei kyrtong ha kane ka elekshon MP na Shillong bad kumjuh ruh na Tura Parliamentary Seat kaban sa long shen ha u snem ban wan.
“Ka BJP kan ïakhun ïa katei ka elekshon MP bad ngi kwah ruh ban sei kyrtong na baroh ar, kata na Shillong bad ruh na Tura,” u la ong haba kren bad ki lad pathai khubor.
Haba kylli la ka BJP kan kynduh ïa u Myntri Rangbah barim ka jylla, Dr. Mukul Sangma ban aireng na Tura Seat, na ka liang u Bah Hek u la ong , “U Dr. Mukul u dei na ka TMC bad kim pat pynïasoh sha ka BJP. U hati dang ha khlaw bad kumta phim lah ban tyrwa lypa ïa ka bniat,” u la bynrap shuh shuh.
Shuh shuh u ong ruh ba mynta shaei ka TMC bad shaei ka BJP namar ki dei la ka jong ka jong. “Kumta, namar ngam dei na ka TMC kumno ngan tip mano ban pynïasoh sha ka BJP? Ka jingkhang ka plie lada ki kwah ban pyniasoh sha ka BJP.”
Ha kawei pat ka liang, u Bah Hek u la ïathuh ruh ba u MLA barim ka Mawsynram, Bah HM Shangpliang u dei uwei na ki kyrtong uba paka bha. “Lada don kiwei pat ki kyrton kiba kham kynsai, khlem pep ka BJP kan tylli lang ban kyrshan ïa u kyrtong ka party,” u la bynrap biang.
