Shillong, Jylliew 14 : Ka jingther jong u lapbah baroh shimiet ka la wanrah biang sa shisien ïa ka jingtwa jong ka khyndew hajan ka khongdong jong ka surok ka ban poi ha riat Rngain hynne ka step ha ka por kumba 5:00 baje ei ei kat haduh ba ka la buh jingeh ïa ki paidbah nongleit nongwan lyngba ka surok Shillong-Dawki.
Watla ha kane ka jingjïa twa jong ki maw bad khyndew kam shym la don pat kano kano ka jingjia ba sngewsih bad ïa ka khyndew la lah ban pynkhuid noh ha ka por janmiet.
Katkum ka kyrwoh na ka ophis jong ka Assistant Commissioner, Pynursla Civil Sub-Division Pynursla la kyntu ïa ki paidbah kiba ïaid lygnba katei ka surok ba kin long kiba peitngor bha namar ym lah ban tip ba ka lah ban jia biang ka jingtwa ki maw bad ka khyndew ha kano kano ka por.
“Kumta la kyntu jur ïa ki paidbah ban long kiba peitngor haba ki ïaid na katei ka surok ha ka por mynmiet bad ruh ban kiar katba lah ban ïaid na kitei ki jaka lada ym donkam eh,” ong ka kyrwoh.
Ha kajuh ka por la ïathuh ruh ba ha katei ka sngi la khang shwa shipor ban ïaid kali katba ka jingpynkhuid ka dang ïaid.
Kumban shu kdew hangne, ka jingjïa twa khyndew ha katei ka bynta jong ka surok Shillong – Dawki dang ha kine ki khyndiat bnai ka la poi ruh haduh u pud ba arngut ki briew ki la duhei ïa la ka jingim.
