Jowai, Jylliew 14: Shi bynta na ka jingrakhe ïa ka ‘World Blood Donors Day’ mynta ka sngi kawei na ki jaka kynshew snam ka Jowai Blood Bank Centre kala pynlong ka jingpynkup burom ïa ki kynhun bad ki briew shimet kiba juh wan ban synñiang snam ha katei ka jaka na ka por sha ka por.
Ka District Level World Blood Donors kala pynlong ïa kane ka porkram ha Jowai Civil Hospital Blood Centre halor ka phang kaba ong “Give Blood, Give Plasma, Share Life, Share.”
Ha kane ka sngi la sam ïa ka khusnam ba kyrpang sha uwei na ki nongsynñiang snam u Specialson Turnia uba la dep ban ai snem haduh 25 sien kumjuh sha u ma Socially Kamar bad u ma Wanmi Laloo kiba la ai snam mar 10 sien.
Ha ka jingïalang la ïashim bynta lang ban pule ïa ka jingkut jingmut (pledge) ba la lam khmat da u Assistant Commissioner bah Wankhraw Kupar Kharbuli, MCS ha ryngkat ka Medical Superintendent jong ka District Civil Hospital, Ialong Dr. Rita Pohrmen, ka Incharge Jowai Civil Hospital Blood Centre Dr. P. Shylla, ki nongtrei ka Blood Bank bad ki nongsynñiang snam.
U bah W.K Kharbuli haba ai jingkren ula pynsngew ba ïa kane ka sngi la rakhe manla ka snem kum ka lad ban ai jingtip sha ki paidbah halor ka jingdonkam ban synñiang ïa ka snam, shi bynta ban ïarap kylliang ïa kiba donkam kyrkieh ïa ka snam. Ula ong ruh kane ka sngi kan pynkynmaw ïa iwei pa iwei ba ngin long kiba kloi ban synñiang lang ïa ka snem khlem kino kino ki jingkhmih lynti ban ïoh nong.
Ha ka juh ka por u kyntu ïa kiwei de khamtam kito kiba don ka bor met kaba koit ba khiah ba kim wan shakhmat ban ai ïa ka snam namar kan long ka jingkmen kaba khraw eh ba kin ïoh na ki nongpdiang bad kumjuh ba kiba ïeit jong ki, ong u Kharbuli.
Na ka liang u bah Kharbuli ula pynpaw ka jingïaroh ïa baroh ki nongsynñiang snam naduh ki kynhun bad ki riew shimet kiba la dep ban ai haduh 25 sien bad 10 sien ïa ka snam jong ki ban ïarap kylliang na ka bynta kiba donkam snam bad kan pynbha ïa ka rukom sumar ha ka por kaba biang.
Ha kane ka sngi kawei na ki kynhun ka Meghalaya Cricket Association & West Jaiñtia Hills District Cricket Association ha ryngkat ka jingïatreilang bad ka Blood Bank, Civil Hospital, Jowai lyngba ki san ngut ki members kiba wan shakhmat ban synñiang ïa ka snam.
