Watla ngim don ha kawei ka kynhun hynrei yn ïatrei lang halor ki mat ba kongsan : Ronnie

Shillong, Jylliew 11 : U Nongïalam ka Liang Pyrshah u bah Ronnie V Lyngdoh u la ong wat la ki Seng Saiñ Pyrthei kiba don ha ka Liang Pyrshah kim don ha kawei ka kynhun (Alliance) hynrei kin ïatrei lang pat halor ki mat kiba kongsan kiba tei ïa ka jylla.
Ki don 14 ngut ki MLA ha ka Liang Pyrshah , 5 ngut ki Congress, 5 ngut ki AITC bad 4 ngut ki VPP.
U la ong ka Congress kan kyrshan beit ïa kino kino ki mat ba kongsan ban wanrah da ka AITC ne ka VPP hapoh ka ïing dorbar.
“ Ka jingkylli ba ngi ïatylli ne em kam mih namar haba ngi wanrah ïa ki mat kiba kongsan hapoh ka ïing dorbar bad halor kita ki mat ngin ïatrei lang da kaba ngin ïamir jingmut lang shwa ban rah ïa ki hapoh ka ïing dorbar. Namar wat la ngim don ha kawei ka kynhun ruh haba donkam ngin ïatrei lang baroh ki seng saiñ pyrthei” ong u bah Ronnie.
Haba la kylli hato ka don ne em ka jingpyrshang ban thaw kawei ka kynhun ha ka Liang Pyrshah, u bah Ronnie u la ong ba ka VPP ka la dep pynpaw lypa ba kam kwah ban don hapoh kawei ka kynhun hynrei kan shong beit marwei ha ka liang pyrshah.
Kat haduh mynta ka Congress kam pat ïoh pdiang kano kano ka jingtyrwa na ka AITC ban thaw kawei ka kynhun.
“Ha ka Dorbar Mang Tyngka ka la paw shai ba kam don kano kano ka jingthmu na kano kano ka seng saiñ pyrthei ban thaw ïa kawei ka kynhun ha ka Liang Pyrshah. Kumta kumba ngi long ka National Party lada don ka jingtyrwa kaba kum kata ngin sa ïakren lang hapoh ka party” ong u bah Ronie.
U la ong ruh wat la ka Liang Synshar ka don hapoh kawei ka kynhun ruh hynrei ki don pat ki mat kiba kawei lane ar ki party kim ju ïa mynjur lang.
Tangba u la ong ba ha ka Liang Pyrshah lada ki ar tylli kiwei ki seng saiñ pyrthei ki wanrah ïa kino kino ki mat jingïakren hapoh ka ïing dorbar kiba dei na ka bynta ka bha ka miat jongka jylla ka Congress kan ai beit ka jingkyrshan.