Jowai, Jylliew 11 : Ka East Jaiñtia Mid-Day Meals Workers Unit, ha kane ka sngi Thodieng kala pynlong ïa ka jingkynduhlang ha West Khliehriat Community Hall, ha ka jingdonlang ki nongkitkam jong ka Central Body ka All Jaiñtia Mid-Day Meals Workers Union.
La sdang ïa ka jingïalang da ka jingduwai, katba ïaka jingïalang la pynïaid da ka kong Pdiangmon Chyrmang kaba long ruh ka President ka EJMDMWU.
La ïoh ïa ka jingkren pdiang burom na ka kong Shim-ika Sungoh members EJMDMWU, ka jingkren halor ka jingeh jong ki nongshet ja haki skul ha kane ka District da ka kong Leki Bareh member East Jaiñtia, la pynsngew ruh ïa ki jingeh bapher bapher kiba ki ïakynduh.
Na ka liang kine ki nongshet ja sngi ki la pynpaw ruh ka jingïaroh ïa ki nongkitkam ka All Jaiñtia Mid-Day Meals Workers Union, kiba la trei shitom na ka bynta ki jingdonkam jong ka Union.
Hadien kane la ïoh ïa ki jingkren bad jingpynshai da u Adviser ka Union u ma Khroo Lamsalanki Pariat uba la ïathuh ba ïa ka jingsiew ne ka honorarium jong ki Cook, ka sorkar kala pynkiew naduh u bnai April, 2022 sha ka 2 hajar tyngka, katba ïa ka pisa kaba dang sah sha ka sorkar kan pyllait ha kine ki sngi ban sawan, ha ka juh ka por u ma Khroo ula pynshlur bad ban jur ïa ki nongshet baroh ba ki dei ban long kiba trei shitom ne tista ha ka kam jong ki, kumjuh ruh ban long kiba leh khuid bad kiba ïatreilang ryngkat ryngkat bad ki Nonghikai khnang ba kane ka Scheme kan nangïaid beit shuh shuh hapoh kane ka jylla.
Ha kane ka sngi la ïoh ruh ki jingpynshai halor ki kam kiba ka All Jaiñtia Mid-Day Meals Workers Union, kala ïaid lynti na u President ka Seng u samla Jerry Anderson Suting, ba hapdeng ka jingïaid lynti ka seng kala ïoh ban kheit ïa katto katne tylli ki soh ka jingjop, kumta u buh ka jingkyrpad ïa ki nongshet ja sngi kiba don ha kane ka thaiñ East Jaiñtia Hills Districts ban long kiba ïatreilang, khnang ba ka sorkar kan jubab ïa ki jingdawa jong ki kum ki Nongshet ja sngi ha ki skul.
Kumba long mynta ki jingdawa ba ha khmat eh jong ka seng ki long ka LPG, ka Maternity leave, Drinking water, khamtam ka Central Share na ka bynta ban kyntiew (Enhance) ïa ka honorarium jong ki Cook na ka Government of India khnang ba ki Cook kin kham ïah ban pyndap pynbiang ïa ki jingdonkam ka ïing ka sem ka jong ki.
