Nongstoiñ, Jylliew, 11: Ka jingdawa symbai dohkha da ki paitbah nongshong shnong ka West Khasi Hills na ka tnad treikam kaba peit ïa ka kam ri dohkha ka jur bha ha kine kine ki sngi. Ha kine ki sngi ba la dep la jan man la ka sngi ki nongri dohkha ki wan ban kit ïa ki symbai dohkha na ka farm kaba don ha Sylleiïawkheiñ harud ka surok Nongstoiñ Shillong.
Ki nongshong shnong na kylleng ki jaka kiba la wan shim symbai dohkha na katei ka farm haba ïakren bad u nongthoh khubor, ki la ong ba ki symbai donkha kiba ki wan shim ha kine ki sngi kim dei satia kiba ki ïoh na ka skhim, hynrei ki shu wan ban thied bad ka dor thied ka dor san spah tyngka shi kilo.
Haba kylli pat haduh katno snem ki dohkha ki la long ban tong bad ban die ha ïew, ki la ong ba lada dei ha ki jaka ba kham syaid ka suiñ bneng ka shim por kumba ar snem ei ei haduh ba kin da long ban tong. Hynrei kiba bun kim ju tong satia ban pynïaid ïew bad naduh ba ki sdang pyllait dohkha ha pung, kim ju ai bam ne bsa ba kin heh kloi ki shu ieh kumto bad don ruh ki trai pung ba hadien shi snem ba ki la pyllait dohkha symbai, ki thied sa da ki dohkha ba la kham heh kiba la don kumba shi kilo shiteng ne ar kilo ki sa pyllait ha pung bad ki aiwai ban pynïakop khwai.
Kitei ki nongri dohkha ki la ong ruh ba lajan baroh ki nongri dohkha ha West Khasi Hills kim pat ïoh satia ka jingpyntbit kumno ban shna ïa ki pung khnang ba ki dohkha kin roi bad kin heh kloi. Nangta kim pat ñiewkor satia ïa ka rukom pynïaid ïew ïa ki dohkha, hynrei ka jingïabeh jong ki ban shna pung dohkha ka long tang na ka bynta ban ai wai ha kiba pynlong ïa ki jingïakop khwai, namar ha kine ki snem ki rawon kiba smat bha ban leit khwai ki ju shim wai ïa ki pung bad ki ïalang bun bun ngut ban leit khwai.
Haba phai pat ha kine ki sngi ba ka sorkar ka la khang ban pynpoi dohkha na shabar, hadien ba la ïoh jingtip ba ki nong pyndap dohkha ki injek da ka dawai formalin ban pynneh slem ïa ki dohkha, lada don ki nong ri dohkha hapoh ka District ki dei kiba la shah pyntbit bad ki don ïa ki dohkha kiba biang ha ki pung jong ki, ka la long ka jingkyrkhu kaba khraw bad ka ïoh ka kot jong ki kan kiew bha bad kin kham ïoh nong bun shah ban ïa kaba shu ai wai ha ki nong pynïakop khwai.
Haba phai ha ki um ki wah kiba dei ki jaka khwai kiba ki sngew tynnad bha bad kiba bun dohkha ha ki snem ba mynshuwa ka long kaba sngewsih ban ong, namar ka jingkynrei jong ki riew shim kabu kiba kwah ban pynjot da kaba siat bom, ker da ki jar, bad ber dawai bih ki wah ki la thylli lut bad ki la sop tang u soh pailen suda.
Nalor kata ka jing pynjot pathar ïa ki khlaw ki btap khamtam ha ki rud wah ka la pynlong ïa ki wah ban kiin nang rit nang rit katba nang mih ki sngi bad wat ha ka por lyiur ba jur slap ruh ka um ka heh tang shiphang ym da la rang u slap tang hadien ar ne lai kynta ka um ka la rngad lut hynrei hym don satia ba patiaw la ki dei ki bor sorkar, ki bor synshar hima ne ki bor shnong.
Lada kane ka jingpynjot pathar ïa ki khlaw ki btap bad ka jingbym kheiñ snep ïa ki um ki wah bad ki dohkha doh pnat kan dang ïai bteng, khlem artatien wat ki jakoid ruh kin duh jait syndon.
