Shillong, Jylliew 11 : Ka lympung ïalehkai Under-14 (Boys) ba pynïaid da ka Shillong Sports Association (SSA) kaba la long ha ka sngi Saitjaiñ jong ka taïew ba lah dep ha madan MFA Third Ground, Polo, Shillong la ïoh ban pynïalehkai ïa ki hynriew tylli ki kynhun, katba ïa ka jingïalehkai hapdeng ka Kynton-U-Mon bad ka Chellenger Football Academy ym shym la ïoh ban pynïalehkai.
Ki hynriew tylli ki team kiba la mih madan ha katei ka sngi ki kynthup ka Mawkriah pyrshah ïa ka Them Rangshken ACC ha kaba ka Them Rangshken ACC ka la khur jingjop da 3-0, ka Sohryngkham SC bad ka Nangkiew Irat SC, ka Sohryngkham ka la jop da 2-0 bad ka Umphyrnai SC ka la pynliem ha ka jingïakhun bad ka Laitkorh SC tang da shi kol.
Na ka bynta ka Them Rangshken ACC, ïa ki lai kol la ïoh ban thep da u Harystar Langstieh ha ka minit ba 23 bad 42 katba ïa ka shi kol la thep da u Banshanskhem Marbaniang ha ka minit ïalehkai ba 27. Na ka bynta ka Sohryngkham SC ïa ki ar kol la thep da u Pynshaiborlang Kharmujai (41min) bad u Fabian kharshetty (48mins). Ha ka jing-ïalehkai ba khatduh jong katei ka sngi, ïa ka shi kol na ka bynta ka Umphyrnai SC la thep da u Damebantei Kharkongor (38min).
