Shongshit ka jingïakop tam plastik ki paidbah ha Wahrit Umpyrli, ka khubor sha ki paidbah ban sumar bad leh khuid ïaka mei mariang
Ha kane ka jingïakop, kala pynlong ruh ïa ki paidbah da ka jing shongshit ban ïashim bynta shitrhem hadien ba naka liang ka seng Samla ka la buh ruh da ki khusnam song pisa sha ki nongïawan ïashim bynta.
Nongpoh, Jylliew 10: Da ka jingangnud ban wanrah ïaka khuid ka suba khamtam ka khubor sha ki paidbah ba kim dei ban dusmon bad pynjot ïaka mei mariang da kaba bret pathar ïaki jaboh jabaiñ bad khamtam ki plastik sha ki wahduid bad ki wah heh, ka Seng Samla Shnong Ïewmawlong mynta ka sngi ka la pynlong daka jingïakop tam plastik naka wahrit Umpyrli, kiba la bret pathar da ki briew ha katei ka wah bad ijli wat ban peit namar bala satah da ki plastik bad ki jaboh.
Ha Kane ka jingïakop, kala pynlong ruh ïaki paidbah da ka jing shongshit ban ïa shim bynta shitrhem hadien ba naka liang ka seng Samla kala buh ruh da ki khusnam song pisa sha ki nongïawan ïashim bynta kiba ïoh tam bun killo ki plastik, kaba long ruh shibynta ban pynkhuid bad pynneh pynsah ïa katei ka wah ha kaba ki nongjop kila ioh ban tam mar 1 quintal tam ki jaboh bad plastik na katei ka wah.
Ha ba kut jong Kane ka jingïakop naka liang ka seng samla ka la ïoh ruh ban pynlait ïaki symbai dohkha ha katei ka wah daka jingthmu ban nang pynroi shuh shuh ïaki dohkha haki wah kiba don ha Shnong ryngkat ka khuid ka suba.
U Samla Aristone Ryndongsngi, President ka Seng Samla Ïew-Mawlong u la pynpaw ïaka jingkmen hadien ba katei ka jingïakop kala long kaba seisoh da ka jingwan shim bynta jong ki paidbah bad lyngba kane ka jingïakop tam plastik ka la wanrah ïaka jingkhuid jingsuba hapoh ka Shnong bad khamtam ha kane ka wah rit kaba don haka Shnong.
U la ïathuh ruh Kane ka jingthep symbai dohkha ha kane ka wah rit ka dei ka jingthmu jong ka Seng Samla ban nang pynneh ïaki dohkha haki wah, namar la ïohi ïaka jingduh jait jong ki dohkha haki wah tang naki daw jong ka jingpynjaboh jong ki briew ki bym shem la suidñiew ïaki jingthaw kiba im ha ki wah.
U Samla Aristone u la kyntu ruh ïaki paidbah ba kin nym leh jakhlia shuh ha kane ka wah hynrei ba kin sumar khuid ïaka khnang ba ki doh kin nangroi na kawei kapor sha kawei pat, bad ka jingmyntoi kan long ïaki paidbah nongshong shnong ha kaba kin ïoh ban khwai doh ban bam na kane ka wah, u la bynrap.