Yn lum jingkheiñ ka sorkar halor ka jingdon ki nongdih drok ban thaw bun ki Rehab Centre

Shillong, Jylliew 7 : U Myntri ka tnad Social Welfare u bah Paul Lyngdoh u la ïathuh mynta ka sngi Balang ba ka tnad jongu kan sa lum jingkheiñ biang ban tip katno ki don ki nongdih drok ha ka jylla khnang ba yn lah ban dang tei bun ki rehabilitation centre.
U Myntri u la pynpaw ruh ïa ka jingdonkam ban pynkylla noh ïa ki kyndon aiñ jongka Narcotic Drugs and Psychotropic Substances (NDPS) Act khnang ban pynkup bor ïa ki bor pulit ban ïakhun pyrshah ïa ka jingkhaïi drok ha ka jylla.
Haba kren bad ki nongthoh khubor mynta ka sngi u bah Paul u la ong kumba long mynta palat 2.5 lak ngut ki nongdih drok ki don ha ka jylla bad kane ka long kat kum ka jingkheiñ kaba don bad ka tnad Social Welfare tangba ïa kane ka jinglum jingkheiñ la leh lai snem mynshwa.
Kiba bun ki nongdih drok ki dei ki samla lud bad ki samla kiba ha ka rta 20-30 snem.
“ Kane ka 2.5 lak ngut ka dei ka jingkheiñ kaba don ha ka tnad Social Welfare kaba la lum lai snem mynshwa bad nga la kren ba donkam ban lum jingkheiñ biang khnang ban tip katno ki don baroh mynta ha ka jylla” ong u bah Paul.
“ Haba phai sha ki jingshisha ba kiba bun ki nongdih drok ha ka jylla ki dei hapdeng ka rta 20-30 snem kaba dei ka rta kaba dang ïabeh bha ïa ki rongphong ka pyrthei bad nalor kata ym dei tang ki shynrang hynrei wat ki kynthei ruh ki pyndonkam drok bad lyngba kine kiew sa ka jingpang HIV bad AIDS namar ym don lawei shuh ïa kine ki briew. Kumta na ka liang ka sorkar kan pynlong bun ki prokram ai jinghikai bad kan pynleit jingmut bha halor kane ka kam kaba buh ïaki khun samla ha ka jingma kaba khraw” ong ubah Paul.
Ka sorkar kan pynkhlaiñ bad pynbun ïa ki rehabilitation centre khnang ban ïoh buh bad ai jinghikai ïa kine ki samla da kaba iatrei lang bad ki seng treimon sngewbha khnang ban pynwandur pat ïa kine kiba la ïaid bakla ka lynti bad ka thong ka long ban leh ha baroh ka jylla ha kine ki hynriew bnai ban wan, ong biang ub ah Paul.
Haba la kylli ba ka jylla haduh mynta kam pat don la ka jong ka rehabilitation centre, u bah Paul ula ïathuh ka sorkar ka dang pynkhreh ban tei bun tylli ki centre namar kawei ruh ka daw ba ka sorkar ka kwah ban tei dei namar ba ki private rehab centre ki oh dor rem palat. “ Ngan shim khia ban pynbiang ïa ki jingdonkam baroh bad ban don ïa kine ki centre da kaba sdang tei shwa na kane ka nongbah Shillong.
Halor ka jingkylli balei ba ki private rehabilitation centre ki shim dor rem nalor ba ki ïoh jingïarap na ka sorkar, u bah Paul u la ong “Ha ka jingshisha ïa kane ka jingkylli la dei ban kylli na ka myntri ka tnad ka koit ka khiah hynrei namar ba nga dei u nongpathai khubor jongka sorkar ngan ïathuh ba ngi la don ki jingïamir jingmut la bunsien bad ka tnad ka koit ka khiah bad shen ngin sa shim ki rai kaei kaba dei ban leh”.
U la ong ba ka jingdonkam ban pynkhlaiñ ïaka NDPS Act ka long ban aibor shuh shuh ïa ki pulit namar kumba long mynta kane ka dei ka aiñ jongka sorkar pdeng bad ki don bun ki kyndon kiba khang lad ïaki pulit ba kin leh ïakaba donkam. U la ong ruh donkam ïa ka jingiatrei lang ki skul ki college, ki Balang bapher bapher ban hikai ïaki khynnah bad samla ban ong “Em ia u Drok”.