Ka la dei ka por ban dawa ba ki kam ba lait ha Ri-Bhoi kin ioh ki nong Ri-Bhoi : Dr C Lyngdoh

Nongpoh, Jylliew 07: U Dr C Lyngdoh ba ju khot ieid kum u Dr Bom u haka jingïalang kabala long ha Umsning u la kren shai ba baroh ki kam haka District Level kiba lait ha Ri-Bhoi ki dei beit ban ioh ki nong Bhoi 80%, katkum ka Office Memorandum No. PR (AR) 25/2022 Part 3 Dated 10/5/2022, Clause F kaba la kren shai ba ki kam kiba lait haka District, 80% lada ym don Garo ba wan thep ka dei ban long naka bynta ki samla kiba sah ha kato ka district, kaba mut ki ki kam kiba lait ha Ri-bhoi District dei ban ioh kiba shong ba sah ha Ri-Bhoi.
U la ong ruh mynta ka kynti ngam banse nga hap ban kren, namar baroh shi kkata bun ki kam ba lait ha Ri-Bhoi ki ioh kiba na kiwei ki District, kiwei ki paralok na kiwei ki district kin sa ong ba u Dr. Bom u wanrah ka jingsngewpher jaitbynriew hynrei kam dei kumta, namar ka Office Memorandum ka kren shai kumta bad kum u MLA un sa lum ruh da ka jingïalang naduh ki Rangbah Shnong bad ki sengbhalang halor katei ka bynta ban dawa ban don ki screening naduh ka por ba thep ïaki application.
U la ong ruh baroh shi katta ngim ju kren pyrshah ïa kino kino ki samla thepkam kiba wan na kiwei ki district ban wad kam ha Ri-bhoi, hynrei ka Office Memorandum kala kren shai ba ki kam ba lait haki district dei ban ai ïa kito kiba shong ba sah haka district, bad kyntu ruh ïaki paralok na Ri-Bhoi ba ki dei ban leh eiei halor kane ban dawa ïaka jong ka hok, ym da kaba pyn huri hura hynrei ban dawa ïaka hok ki don shibun ki lad ki lynti, bad ban ïakynduh ruh ïa u DC ban peit bha naduh ka por ba thep application laka long online ne offline.