Ka Mawlai pyrshah ïa ka Khliehmawlieh, ka Rangdajied bad ka Shillong Lajong

Shillong, Jylliew 05 : Ka lympung ïalehkai Meghalaya State League 2023 ka la jam mynta sa sha ka semifinal, ha kaba ka Mawlai kan sa ïakhun pyrshah ïa ka Khliehmawlieh Youth Club, katba ka Rangdajied kaba wan ba ar ha u snem 2019 kan ïakhun pyrshah ïa ka Shillong Lajong kaba dang dei ka lahduh haduh mynta jong ka MSL. Ïa katei ka jingïalehkai semifinal la pynlong ka jingpynïakap ha ka janmiet sngi Nyngkong.
Ïa ka jingïalehkai semifinal yn pynïalehkai arsien ha kaba ki saw tylli ki team kin ïoh ban ïakhun ha la ïing bad shabar na la ïing (home & away) kaban sdang ha ka 10 tarik Jylliew katba ka leg kaba ar kan long ha ka 13 tarik Jylliew. Ïa ka jingïalehkai phainal yn pynlong ha madan First Ground, Polo, Shillong ha ka 17 tarik Jylliew 2023.
Ïa ka jingpynïakab ïa ki team la pynlong ha ka jingdon ki saw ngut ki kongsan ba kyrpang kiba dei ruh ki khlur ïalehkai phutbol jong ka Jylla Meghalaya ba kynthup u Redeem Tlang, Aiban Dohling bad u Halen Nongtdu bad ka FIFA Assistant Referee ka Kong Ri-ïohlang Dhar. La sakhi lang ruh u Wanshanbor Kharkrang uba dei u Tournament Director jong ka MSL bad kiba la wan mihkhmat na kitei ki saw tylli ki team.
Kane kadei ka samoi kaba nyngkong ha kaba ka Mawlai ka la ïashim bynta ha ka MSL bad ka la lah shisha ban ïalehkai bha, da kaba jop baroh sansien ki jingïakhun na ka Group A. Ka Rangdajied ka bat kyrdan ba nyngkong na ka Group B bad kan sa ïakhun pyrshah ïa ka Shillong Lajong kaba pyndep kyrdan ba nyngkong na ka Group C bad kaba dang sah sa shisien ïalehkai mynta ka sngi Ba ar.
Ka Khliehmawlieh kadei tang ma ka marwei ka club kabym dei na nongbah Shillong kaba la ïoh rung sha ka semifinal bad ka buh ka thong ban pynshaïong ïa ka kynhun ïalehkai pyrshah ha ka semifinal.
Katba ka jingïalehkai kaba khatduh na ka Group D bad ka jingïalehkai kaba la long ha ka sngi Nyngkong na ka Group C, ka Chipakkore ka la pynliem kput da 9-2 kol pyrshah ïa ka Wa’sa FC bad ka Mawten ka la pynliem da 3-0 kol pyrshah ïa ka Lumdiengngan.
Ha Chandmari Ground ha Tura, ka Chipakkore ka la shah thep kol ha ki phra minit hynrei ka la lah ban wanphai da kaba thep saw kol lyngba u Balkan Marak (18, 47, 63, 65), ar kol na u Harlee K Marak (13, 84), ar kol lyngba u Ranggira R Marak (80, 90) bad shi kol na u Johnfield A Sangma (47). Ka Wa’sa ka la ïoh ban thep ar kol lyngba u Gilseng Momin (8) bad u Threesbirth Momin (62min).
Ka jingïalehkai mynta ka sngi kadei na ka bynta ka jingïaknieh nam ba lai bad da ka jingjop ka Chipakkore ka la lah ban ïoh bat nam ba lai katba ka Wa’sa, ka hiar sha ka kyrdan ba saw
Ha ka jingïalehkai ha MDSA Ground ha Mawkyrwat, ka Mawten ka la ïoh ban thep kol lyngba u Reinjoywell Wasrde (31), Lastbornson Marwein (60) bad u Iaidborlang Thongni (90+1). Lyngba katei ka nam jop, ka Mawten ka la ïoh ban bat kyrdan ba lai shkhmat ïa ka Riangdo, kaban sa aireng khatduh pyrshah ïa ka Shillong Lajong ha ka jingïalehkai mynta ka sngi Ba ar ha ka por 3 baje janmiet.